Беларусь прадставіць сваю экспазіцыю на IX Кітайскай міжнароднай выстаўцы імпарту ў Шанхаі
Фота з архіва 12 кастрычніка, Мінск . Беларусь прадставіць сваю экспазіцыю на IX Кітайскай міжнароднай выстаўцы імпарту ў Шанхаі з 5 па 10 лістапада. Аб гэтым паведамілі ў прэс-службе Міністэрства прамысловасці.
У нацыянальнай экспазіцыі будзе прадстаўлены і прамысловы патэнцыял краіны. Прымуць удзел вядучыя прадпрыемствы сістэмы Мінпрама: ААТ «БМЗ», ААТ «Планар», ААТ «МАЗ», ААТ «МТЗ», ААТ «Гомсельмаш», ААТ «Інтэграл», СЗАТ «БЕЛДЖЫ», ААТ «БЕЛАЗ».
Акрамя рэкламнай прадукцыі, будуць прадстаўлены макеты тэхнікі. Напрыклад, збожжаўборачнага і кормаўборачнага камбайнаў «Гомсельмаш».
Таксама наведвальнікам прадэманструюць макет завода БЕЛДЖЫ. Можна будзе віртуальна прагуляцца па цэхах прадпрыемства, прыняўшы ўдзел у інтэрактыве, і нават «сабраць» свой уласны электрамабіль.
