«Беларусь паслядоўна падтрымлівае міралюбны і стваральны парадак дня». Алейнік на Асамблеі МПС у Танзаніі
Фота Савета Рэспублікі Нацыянальнага сходу Рэспублікі Беларусь 7 кастрычніка, Мінск . Беларусь заўсёды падтрымлівала і падтрымлівае міралюбны, стваральны парадак дня. Гэта адзначыў 6 кастрычніка старшыня Пастаяннай камісіі па міжнародных справах і нацыянальнай бяспецы Савета Рэспублікі Сяргей Алейнік на палях 153-й Асамблеі Міжпарламенцкага саюза і звязаных з ёю мерапрыемстваў у горадзе Аруша (Аб’яднаная Рэспубліка Танзанія), .
«У рамках Міжпарламенцкага саюза Беларусь заўсёды падтрымлівала і падтрымлівае міралюбны, стваральны парадак дня. Мы выступаем за павышэнне ўзроўню парламенцкай дыпламатыі ва ўрэгуляванні канфліктаў, забеспячэнні ўстойлівага развіцця, пашырэнні стваральнага, аб’яднальнага парадку дня», — сказаў Сяргей Алейнік. Удзел беларускага парламентарыя ў 153-й Асамблеі МПС пачаўся з запісу ў кнізе ганаровых гасцей парламента Танзаніі.
На сустрэчы са спікерам Нацыянальнай асамблеі Танзаніі Мусой Зунгу падкрэслены дружалюбны характар двухбаковых адносін. «Абмеркавалі перспектывы развіцця і ўмацавання палітычнага дыялогу, міжпарламенцкага ўзаемадзеяння. Дамовіліся аб далейшых кантактах на міжпарламенцкім узроўні», — адзначыў Сяргей Алейнік.
Асаблівая ўвага, паводле яго слоў, удзелена ўмацаванню гандлёва-эканамічнага супрацоўніцтва паміж краінамі, перш за ўсё ў сферах прамысловай кааперацыі, павышэння ўзроўню харчовай бяспекі Танзаніі і развіцця супрацоўніцтва ў сферы сельскай гаспадаркі. Абмяркоўваліся пытанні аховы здароўя, адукацыі — у цэлым тыя напрамкі, якія цікавяць танзанійскі бок і па якіх маюць намер далей працаваць.
Акрамя таго, адбыліся перагаворы са старшынёй Сената Ісламскай Рэспублікі Пакістан Юсуфам Разой Гілані. Бакі канстатавалі супадзенне поглядаў на фарміраванне новага, справядлівага шматпалярнага парадку і дамовіліся аб прадаўжэнні інтэнсіўнага міжпарламенцкага дыялогу паміж Беларуссю і Пакістанам.
Асамблея Міжпарламенцкага саюза — унікальная пляцоўка для разгляду актуальных пытанняў міжнароднага парадку дня. Удзельнікі сусветнага парламенцкага форуму — дэлегацыі больш як 120 краін. Беларускі бок прадстаўляюць старшыня Пастаяннай камісіі па міжнародных справах і нацыянальнай бяспецы Савета Рэспублікі Сяргей Алейнік, член гэтай Пастаяннай камісіі Ала Смаляк, а таксама старшыня Пастаяннай камісіі па міжнародных справах Палаты прадстаўнікоў Сяргей Рачкоў. Беларуская дэлегацыя прыме ўдзел у агульнапалітычных дыскусіях, шэрагу мерапрыемстваў, якія запланаваны па лініі Парламенцкай сеткі Руху недалучэння, Парламенцкай асамблеі АДКБ, у пасяджэнні геапалітычнай групы «Еўразія». Фота Савета Рэспублікі Нацыянальнага сходу Рэспублікі Беларусь
