Кушнарэнка: Мінская вобласць упэўнена ўтрымлівае званне жытніцы краіны
Аляксей Кушнарэнка 19 верасня, Дзяржынск . Мінская вобласць упэўнена ўтрымлівае званне жытніцы краіны. Гэта падкрэсліў старшыня Мінскага аблвыканкама Аляксей Кушнарэнка на ўрачыстым мерапрыемстве ўшаноўвання перадавікоў жніва на фестывалі працаўнікоў вёскі «Дажынкі», што праходзяць сёння ў Дзяржынску.
Як адзначыў кіраўнік цэнтральнага рэгіёна, па прамежкавых выніках аграсезона вобласць упэўнена ўтрымлівае званне жытніцы краіны.
Звяртаючыся да ўдзельнікаў фестывалю працаўнікоў вёскі, кіраўнік вобласці падкрэсліў, што 30 гадоў таму Прэзідэнт нашай краіны даў старт першым «Дажынкам». І гэта свята за дзесяцігоддзі стала сапраўды народнай традыцыяй суверэннай дзяржавы. У розныя гады «Дажынкі» прымалі Нясвіж, Слуцк, Маладзечна і іншыя гарады, якім быў нададзены магутны імпульс развіцця.
«Мы ўжо ганарымся сваім караваем у памеры 2,5 млн т збожжа, рэкорднай ураджайнасцю збожжа і рапсу. У аснове такіх вялікіх перамог — праца на месцах. Адзінаццаць нашых раёнаў, а гэта палавіна вобласці, сабралі больш за 100 тыс. т збожжа. Небывалы гістарычны рэкорд у Капыльскага і Слуцкага раёнаў — па 200 тыс.т збожжа. Усё гэта дзякуючы захаванню дысцыпліны, выкананню тэхналогій і працавітасці аграрыяў цэнтральнага рэгіёна», — сказаў Аляксей Кушнарэнка.
Сёлета ў Мінскай вобласці 1020 экіпажаў сабралі больш за тысячу тон ураджаю, а 723 вадзіцелі перавезлі больш за тысячу тон. Яшчэ 242 экіпажы сабралі больш за дзве тыс. т, 44 — намалацілі больш за тры тыс. т, 10 — больш за чатыры тыс. т і адзін экіпаж звыш шасці тыс. т.
«Гонар усёй Беларусі, адзначаны асабіста Прэзідэнтам нашай краіны, — механізатар з сельгаспрадпрыемства «Кухчыцы» Клецкага раёна Павел Міхайлавіч Шуціла, які сабраў 7,4 тыс.т збожжа на беларускім камбайне. На адвозцы збожжа ад камбайнаў асабліва вызначыўся Віталь Іванавіч Кішко з ААТ «Кухчыцы» Клецкага раёна, які перавёз ад камбайнаў 8,5 тыс. т збожжа. Сімвалічна, што ў Год беларускай жанчыны ў гэты лік тысячнікаў увайшлі дзве прадстаўніцы прыгожага полу, якія працавалі на сваіх «жаночых» камбайнах», — адзначыў Аляксей Кушнарэнка.
Ён падкрэсліў, што самае высокае прызнанне нашых заслуг у сельскай гаспадарцы — Падзяка Прэзідэнта Рэспублікі Беларусь.
«Сёння мы ставім мэту не страціць бясцэнны вопыт старэйшага пакалення і беражліва перадаць яго моладзі. Менавіта таму ў вобласці з сённяшняга дня запушчаны клуб камбайнераў-перадавікоў «Залаты колас», а пры ім — маладзёжны клуб «Каласок», дзе моладзь зможа атрымліваць вопыт з першых вуснаў», — адзначыў старшыня Мінскага аблвыканкама.
«Робім зачын і на будучы год — большая частка палёў пад азімыя збожжавыя ўжо ўзарана. І лічба тры мільёны тон збожжа, якая здавалася нам калісьці фантастычнай, блізкая да дасягнення», — рэзюмаваў Аляксей Кушнарэнка.
