Беларусь адкрыта для інвестараў, гатовых да доўгатэрміновага ўзаемавыгаднага партнёрства — Мінэканомікі
Фота з архіва 11 верасня, Мінск . Беларусь адкрыта для інвестараў, гатовых да доўгатэрміновага ўзаемавыгаднага партнёрства. Аб гэтым заявіў першы намеснік міністра эканомікі Іван Вежнавец на пленарным пасяджэнні V Міжнароднага форуму эканамічнага супрацоўніцтва ў Мінску, паведамілі ў прэс-службе ведамства.
Іван Вежнавец нагадаў патэнцыяльным інвестарам аб асноўных канкурэнтных перавагах Беларусі. Да іх ён аднёс выгаднае геаграфічнае становішча на скрыжаванні транспартных калідораў Поўнач — Поўдзень і Усход — Захад, свабодны доступ на больш як 180-мільённы рынак ЕАЭС і спрыяльныя ўмовы для інвесціравання.
«Для інвестараў, арыентаваных на высокатэхналагічны экспарт і імпартазамяшчэнне, дзейнічаюць ільготныя рэжымы ў СЭЗ і ў індустрыяльным парку «Вялікі камень», а таксама гібкія механізмы інвестыцыйнага заканадаўства», — адзначыў першы намеснік міністра.
Акрамя таго, да галоўных пераваг краіны Іван Вежнавец аднёс чалавечы капітал. «Беларусы — адукаваныя, працавітыя людзі, гатовыя эфектыўна працаваць і асвойваць новыя кампетэнцыі», — рэзюмаваў ён.
