Ад гарачага харчавання да медыкаў. Пад Гомелем эвакуіраваных з Алешак гатовы сустракаць у палатачным лагеры
31 кастрычніка, Гомельскі раён . Для эвакуіраваных з прыфрантавога горада Алешкі на тэрыторыі гомельскага аэрапорта разгарнулі палатачны лагер,
Беларускі бок выконвае сваю ролю ў гуманітарнай аперацыі для мірных жыхароў прыфрантавога горада Алешкі Херсонскай вобласці. Мінск застаецца ўдзельнікам міжнароднага працэсу, забяспечваючы выкананне дамоўленасцей паміж Масквой і Кіевам пры правядзенні гуманітарнай місіі.
Аэрапорт Гомель стаў адной з ключавых кропак у гэтым маршруце. Тут 29 кастрычніка адбылася сустрэча прадстаўнікоў расійскай і ўкраінскай дэлегацый, адкуль удзельнікі гуманітарнай аперацыі на адным борце адправіліся ў напрамку Алешак.
Днём 30 кастрычніка пачалася добраахвотная эвакуацыя жыхароў з прыфрантавой зоны. За кожным чалавекам было захавана права выбару далейшага напрамку: украінскі або расійскі. Ход місіі каардынуюць упаўнаважаныя па правах чалавека на месцы.
Транзіт — праз гомельскі аэрапорт. На яго тэрыторыі разгорнуты паўнацэнны палатачны квартал, дзе для жыхароў Алешак прадугледжана гарачае харчаванне і магчымасць адпачыць пасля доўгай дарогі.
Палатачны гарадок з сямі абагравальных модуляў размешчаны паблізу пасадачнай паласы, таму, спусціўшыся з самалёта, людзі атрымаюць дапамогу і падтрымку, у якой яны маюць патрэбу.
Мясцовыя ўлады арганізавалі ўсё неабходнае, каб на беларускай зямлі эвакуіраваныя з горада Алешкі адчулі сябе ў поўнай бяспецы. Прынцыповая пазіцыя — каб людзі ўсіх узростаў адчулі цяпло і падтрымку беларусаў.
Тым, хто прыбыў фактычна з зоны баявых дзеянняў, неабходную дапамогу гатовы аказаць псіхолагі абласнога ўпраўлення МНС, валанцёры Чырвонага Крыжа, а таксама медыцынскія работнікі.
Сярод эвакуіраваных ёсць маламабільныя грамадзяне, таму дзяжураць у разгорнутых абагравальных модулях і медыцынскія спецыялісты. Побач — карэты хуткай дапамогі.
Аб гатоўнасці №1 заявіла намеснік начальніка галоўнага ўпраўлення па ахове здароўя Гомельскага аблвыканкама Наталля Масцерская. «Мы поўнасцю гатовы да аказання медыцынскай дапамогі ўсім прыбываючым. Для гэтага ў нас ёсць усё неабходнае. Задзейнічана 21 брыгада хуткай медыцынскай дапамогі, уключаючы рэанімабіль. Кожны экіпаж укамплектаваны высокакваліфікаванымі практыкуючымі медыцынскімі работнікамі. Ёсць неабходны запас лекавых прэпаратаў, вырабаў медыцынскага прызначэння і аказання меддапамогі як дарослым, так і дзецям», — расказала яна. 
Гомельскія медыкі гатовы аказаць неабходную дапамогу як на месцы, так і ва ўстановах, калі гэта спатрэбіцца. «Пры неабходнасці пацыентаў шпіталізуюць у стацыянар, дзе імі зоймуцца спецыялісты па профілі выяўленых захворванняў. На месцы таксама можам змераць ціск, правесці агляд, першасную хірургічную апрацоўку, даць лякарствы згодна з выяўленымі сімптомамі. Усё, што неабходна, мы зробім», — акцэнтавала Наталля Масцерская, адзначыўшы, што вопыт аказання такой падтрымкі ў гомельскіх спецыялістаў ёсць. «Для нас гэта вельмі важна і адказна», — дапоўніла яна.
Намеснік старшыні Гомельскай абласной арганізацыі Беларускага Чырвонага Крыжа Алеся Касцюк таксама акцэнтавала: усё гатова да прыбыцця жыхароў Алешак яшчэ з вечара.
«Місія Беларускага Чырвонага Крыжа заўсёды нацэлена на аказанне дапамогі людзям, якія маюць у ёй патрэбу. Мы гатовы і да гэтай гуманітарнай місіі. Загадзя ўстаноўлены нашы модулі Чырвонага Крыжа , падрыхтавана ўсё неабходнае, што можа спатрэбіцца: ад дзіцячых і дарослых памперсаў да іншых прадметаў ужытку, уключаючы гігіенічныя, а таксама харчаванне — на любы выбар», — сказала яна. 
На выпадак дажджу падрыхтаваны парасоны і дажджавікі, а таксама цёплыя пледы. Падключыліся да місіі 50 валанцёраў БЧК. «Наша асноўная задача — падтрымаць людзей, суправадзіць іх, выказаць і словы падтрымкі. Гэта таксама немалаважна. Усе нашы валанцёры навучаны аказанню не толькі першай дапамогі, але і першай псіхалагічнай дапамогі. Мы гатовы падтрымаць кожнага», — расказала Алеся Касцюк.
Прадугледжаны і спецыяльныя месцы для знаходжання з дзецьмі. Гатовы аказаць падтрымку грамадзянам з дзецьмі любога ўзросту: ад немаўлят да дзяцей старэйшых. Таксама завезена дзіцячае харчаванне, памперсы розных памераў, цацкі і інш. Малочныя і безмалочныя сумесі, фруктовыя, агароднінныя і мясныя пюрэ беларускай вытворчасці — прадугледжаны максімум варыянтаў.
Арганізаваны гульнявыя зоны, каб маленькія пасажыры маглі пераключыцца ў чаканні наступнага этапу шляху. Напрыклад, ім прапануюць паглядзець мультфільмы або памаляваць пад наглядам валанцёраў Беларускага Чырвонага Крыжа.
Падрыхтаваны і харчовыя наборы ад БЧК. У іх сабраны прадукты з працяглым тэрмінам прыдатнасці, якія жыхары Алешак могуць узяць з сабой у дарогу.
Як расказаў начальнік Гомельскага абласнога ўпраўлення МНС Віталь Бокун, работнікі МНС у адпаведнасці са сваёй кампетэнцыяй таксама прымаюць удзел у гуманітарнай місіі. «Адна з асноўных задач — аказанне дапамогі маламабільным грамадзянам, у тым ліку нават у разгрузцы багажу. Дадаткова прадугледжаны модулі для арганізацыі гарачага харчавання, работы псіхалагічнай службы. Задзейнічана амаль 30 работнікаў МНС. Мы поўнасцю гатовы да выканання ўсіх задач па прызначэнні для аказання дапамогі грамадзянам, якія прыбываюць на тэрыторыю Беларусі», — запэўніў ён. 
Усяго на тэрыторыі гомельскага аэрапорта ва ўзаемадзеянні з Беларускім Чырвоным Крыжом устаноўлена сем модуляў. Яны прызначаны для абагравання людзей, прадастаўлення дадатковага харчавання. У іх створаны і камфортныя ўмовы для работы медыкаў, а таксама псіхалагічнай службы МНС.
Беларускі бок прадугледзеў усе магчымыя варыянты падзей.
Вядома, што многія жыхары Алешак пакінулі дамы разам з гадаванцамі, таму прадуманы дробязі і па гэтых пытаннях. У прыватнасці, падрыхтаваны нават корм для жывёл. Работнікі МНС забяспечылі спецыяльны транспарт для іх перавозкі.
Як паведамлялася, удзел у гэтым гуманітарным працэсе з’яўляецца працягам паслядоўнай міралюбнай палітыкі і нязменнай міратворчай пазіцыі Беларусі. Раней на тэрыторыі пункта пропуску «Новая Гута» неаднаразова праходзілі розныя гуманітарныя місіі. Тут праводзіліся абмены ваеннапалоннымі і целамі загінулых ваеннаслужачых, уз’ядноўваліся са сваімі сем’ямі мірныя грамадзяне з Расіі і Украіны.
Населены пункт Алешкі размешчаны на левым беразе Дняпра за 5 км ад Херсона. Горад знаходзіцца ў непасрэднай блізкасці ад лініі фронту і на працягу апошніх гадоў рэгулярна трапляў пад абстрэлы.
Для правядзення гуманітарнай аперацыі расійскі і ўкраінскі бакі пры пасрэдніцтве ЗША — і перш за ўсё жонкі амерыканскага лідара Меланіі Трамп — дасягнулі пагаднення аб спыненні агню ў раёне населенага пункта.
Фота Марыны Васільевай, Віталя Піваварчыка
