«Не кантроль, а дапамога». Як парламентарыі будуць сачыць за ходам уборачнай кампаніі
23 ліпеня, Магілёў . Старшыня Савета Рэспублікі Наталля Качанава правяла селектарную нараду з членамі Савета Рэспублікі па пытаннях уборачнай кампаніі бягучага года,
Асноўнае пытанне сённяшняга абмеркавання — уборачная кампанія. Раней на селектарнай нарадзе кіраўнік дзяржавы Аляксандр Лукашэнка ўказаў на шэраг важных задач і праблемных момантаў, за вырашэннем якіх неабходна ўзмацніць кантроль на ўсіх узроўнях і этапах. Як адзначыла Наталля Качанава, уборка ўраджаю — адзін з важнейшых перыядаў у краіне, і ад яе поспеху залежыць многае. І ў першую чаргу — харчовая бяспека.
Старшыня Савета Рэспублікі нацэліла ўдзельнікаў нарады на актыўную работу на месцах: наведваць сельскагаспадарчыя прадпрыемствы, цікавіцца ходам уборкі, нарыхтоўкай кармоў і прамежкавымі вынікамі, умовамі работы людзей, іх настроем. Пры гэтым яна падкрэсліла — тут не патрэбны справаздачы дзеля справаздач, гэта не кантроль, а магчымасць на сваім узроўні аказаць нейкую дапамогу, калі яна будзе неабходна.
Дапамога з уборкай ураджаю на прыватных падворках, фермерскім гаспадаркам, работа працоўных мігрантаў — на ўсё гэта дэпутаты ўсіх узроўняў павінны звяртаць увагу. Наталля Качанава яшчэ раз адзначыла: важна быць не проста пабочным наглядальнікам, а актыўна ўключацца ў гэтыя працэсы.
Як заявіў старшыня Магілёўскага абласнога Савета дэпутатаў, член Савета Рэспублікі Аляксандр Гарошкін, цяпер вельмі важная пара ў жыцці дзяржавы, а таму заставацца ўбаку нельга. Задачы былі пастаўлены і канкрэтызаваны.
«У гэту работу павінны ўключацца ўсе на 100 працэнтаў. Так, нашы аграрыі сваю задачу ведаюць і разумеюць, яны старанна рыхтаваліся да сезона і цяпер ударна працуюць у палях. Наталля Іванаўна сёння канкрэтна і выразна сказала аб задачах дэпутацкага корпуса. Мы можам арганізаваць работу ўсёй дэпутацкай вертыкалі, у гэтым выпадку — у вобласці. Мы не кантралюючыя органы. Наша галоўная задача — бываць у працоўных калектывах і пры неабходнасці, калі патрэбна нейкая дапамога, гэта пытанне ўздымаць перад выканаўчай уладай і аказваць усялякую пабочную дапамогу і падтрымку», — сказаў ён.
Аляксандр Гарошкін выказаў упэўненасць у тым, што аграрыі рэгіёна справяцца з усімі пастаўленымі перад імі мэтамі. «А мы будзем у дапамогу, калі такая будзе неабходна», — падкрэсліў ён.
Пытанне аб працоўных мігрантах датычыцца любога рэгіёна, у тым ліку і Магілёўскай вобласці. «Мы цудоўна ведаем аб тым, што, на жаль, на некаторых прадпрыемствах ёсць пытанні з працоўнымі рэсурсамі. Таму адно з выйсцяў, якое прапанавана было ўрадам, кіраўніком дзяржавы, — гэта прыцягненне працоўных мігрантаў, — расказаў Аляксандр Гарошкін. — Тут самае галоўнае — стварыць умовы для пражывання людзей, якія сюды прыедуць. Забяспечыць ім работу, ну і, адпаведна, кантраляваць яе ход. І я думаю, што пры выкананні ўсіх гэтых правіл і ад гэтага напрамку таксама павінен быць поспех».
Фота Мікалая Пятрова
