Дзіцячы музычны конкурс упершыню адбыўся на «Славянскім базары — 2003»
22 чэрвеня, Віцебск . Да юбілейнага XXXV Міжнароднага фестывалю мастацтваў «Славянскі базар у Віцебску» засталося 24 дні. БЕЛТА прапануе акунуцца ў рэтраспектыву: штодзённа расказваем аб самых яркіх момантах кожнага папярэдняга «Славянскага базару». Сёння — аб падзеях 2003 года. XII Міжнародны фестываль мастацтваў «Славянскі базар у Віцебску», які праходзіў з 12 па 17 ліпеня, падарыў паклоннікам культурнага форуму новыя праекты — Міжнародны дзіцячы музычны конкурс і Дзень Саюзнай дзяржавы, .
Адкрыццё «Славянскага базару» ў 2003 годзе прайшло ў Дзень Саюзнай дзяржавы — дэбютнага праекта, які ў далейшым пашырыўся і пачаў праводзіцца на працягу некалькіх дзён. Была заснавана і новая ўзнагарода — дыплом Пастаяннага камітэта Саюзнай дзяржавы «За творчае ўвасабленне ідэй дружбы народаў Беларусі і Расіі». Са сцэны Летняга амфітэатра на гала-канцэрце Прэзідэнт Беларусі Аляксандр Лукашэнка адзначыў, што фестываль вытрымаў выпрабаванне часам, а ідэя яднання славянскіх народаў пачала прыцягваць на маштабнае мерапрыемства ўсё новых сяброў. Сваё благаславенне «Славянскаму базару» даў мітрапаліт Мінскі і Слуцкі Філарэт, Патрыяршы экзарх усяе Беларусі, які заклікаў арганізатараў зрабіць усё, каб культурны форум служыў узвышэнню духу, гармоніі чалавека і прыроды, выхаванню дабрачыннасці.
Галоўным прызам Міжнароднага конкурсу маладых выканаўцаў з гэтага года стала «Залатая ліра». Упершыню за 12 гадоў «Славянскага базару» Гран-пры дастаўся беларусу — Максіму Сапацькову.
Максім Сапацькоў (злева)
Традыцыю Міжнароднага фестывалю дзіцячай творчасці прадоўжыў новы праект — Міжнародны дзіцячы музычны конкурс. Старшынёй журы на гэтым творчым спаборніцтве стаў кампазітар, народны артыст Беларусі Васіль Раінчык. Гран-пры заваяваў выканаўца з Румыніі — юны спявак Ноні.
Дзень культуры Беларусі быў напоўнены ўспамінамі пра выдатнага беларускага кампазітара, народнага артыста СССР, кавалера ордэна Францыска Скарыны Уладзіміра Мулявіна. Створаная ім група «Песняры» была пастаянным госцем фестывалю, на сцэне Летняга амфітэатра ў 1994 годзе адзначалася 25-годдзе творчай дзейнасці праслаўленага айчыннага ансамбля.
Яшчэ адным дэбютным мерапрыемствам стала свята славянскай паэзіі. Фестывальныя канцэрты праводзіліся ва ўсіх абласных цэнтрах і Мінску.
На 12-ы фестываль з’ехаліся артысты з 24 краін. На віцебскі творчы форум былі акрэдытаваны амаль 480 прадстаўнікоў СМІ з Беларусі, Расіі, Украіны, Балгарыі, Латвіі, Літвы.
Асноўныя мерапрыемствы XXXV Міжнароднага фестывалю мастацтваў «Славянскі базар у Віцебску» пройдуць з 16 па 19 ліпеня, а першыя канцэрты адбудуцца 14 ліпеня.
Фота з архіва
