Лебедзева выйграла агульны залік Кубка свету па скачках на батуце
Яна Лебедзева. Фота sport5.by 20 кастрычніка, Мінск . Беларускія батутысты сталі прызёрамі агульнага заліку розыгрышу Кубка свету па скачках на батуце 2026 года, паведамілі БЕЛТА ў прэс-службе Мінспорту.
Апошнім стартам Кубка свету стаў этап у нямецкім Котбусе, на якім беларусы не выступалі. Нягледзячы на гэта, першае месца ў агульным заліку ў жаночых індывідуальных скачках захавала наша Яна Лебедзева, другую пазіцыю заняла Кацярына Яршова.
У мужчын другім стаў Андрэй Буйлоў, а ўладальнік Кубка свету двух папярэдніх сезонаў Іван Літвіновіч фінішаваў пятым. У сінхронных скачках Андрэй і Іван размясціліся на другім радку, у жанчын Лебедзева замкнула тройку разам з Віялетай Бардзілоўскай.
У міксце дуэт Літвіновіч — Лебедзева таксама стаў у агульным заліку трэцім. Усяго ў розыгрышы Кубка свету 2026 года беларусы заваявалі 20 узнагарод (10-7-3). Галоўны старт сезона — чэмпіянат свету па скачках на батуце — пройдзе ў Кітаі ў пачатку лістапада.
