Мы не можам дазволіць спыніць наш род — Пярцоў аб каштоўнасцях беларусаў
Уладзімір Пярцоў. Фота газеты «Гродзенская праўда» — БЕЛТА 15 кастрычніка, Гродна . Жывыя сустрэчы патрэбны, каб прывіць новаму пакаленню нашы традыцыі, захаваць беларускі ўклад, процістаяць нетрадыцыйным «каштоўнасцям», якія нясуць заходнія СМІ і культура. Аб гэтым сказаў першы намеснік кіраўніка Адміністрацыі Прэзідэнта Беларусі Уладзімір Пярцоў, размаўляючы з журналістамі перад сустрэчай з навучэнцамі і выкладчыкамі Лідскага каледжа ГрДУ імя Янкі Купалы,
Сустрэча праходзіць у адзіны дзень інфармавання і прысвечана тэме «Традыцыйныя каштоўнасці беларусаў: сям’я, грамадства, дзяржава».
«Калі мы пачынаем гаварыць аб традыцыйных, нам зразумелых і спрадвечных каштоўнасцях здаровай сям’і, шматдзетнай сям’і, прадаўжэння нашага роду, нашай нацыі, у галовах у моладзі часам узнікае пэўная сумятня, таму што сацыяльныя сеткі і заходняя культура ў цэлым моладзі нясуць крыху іншыя арыенціры. На жаль, гэта вар’яцтва цяпер там развіваецца з нейкай каласальнай сілай», — заявіў Уладзімір Пярцоў.
Ён выказаў меркаванне, што жывыя сустрэчы патрэбны для таго, каб паўплываць на гэта, пераканаць, паставіць моладзь на правільныя рэйкі — на нашы асновы, захаваць наш беларускі ўклад.
«Трэба не толькі сваім маналогам, непасрэдным зваротам, але і адказамі на нязручныя пытанні, на вось гэтыя супярэчнасці, якія ў галовах у дзяцей, на жаль, цяпер сфарміраваліся пад уздзеяннем сацсетак, пераконваць, што жыццё прадаўжаецца, і род прадаўжаецца, і прырода, і рэлігія — усё задумана так, каб на нашай зямлі мы жылі згодна са сваімі традыцыямі», — падкрэсліў першы намеснік кіраўніка Адміністрацыі Прэзідэнта.
Уладзімір Пярцоў нагадаў, што ў ходзе апошніх войнаў мы страцілі вялікую колькасць нашых грамадзян, патэнцыял. Паводле падлікаў вучоных, калі б не Вялікая Айчынная вайна, у Беларусі жыло б больш за 16 млн чалавек. Усе эканамічныя нішы былі б запоўнены. Шмат таленавітых людзей нарадзілася б на свет.
«Мы не можам дазволіць спыніць наш род, мы не можам сабе дазволіць паддацца на ўсю тую паскуднасць і гадасць, «нетрадыцыёншчыну», якая ідзе з заходніх сродкаў масавай камунікацыі. Таму будзем сустракацца, размаўляць, будзем уласным прыкладам, пераканаўчымі фактамі, доказамі фарміраваць у дзяцей і моладзі той самы адзіна правільны светапогляд і адносіны да пытання сям’і, мацярынства, бацькоўства, здаровай сям’і. Гаварыць і пра тыя складанасці, з якімі можа сутыкнуцца маладая сям’я, што цяпер, на жаль, нярэдка з’яўляецца прычынай для разводаў, што дрэнна», — такім меркаваннем падзяліўся першы намеснік кіраўніка Адміністрацыі Прэзідэнта.
Уладзімір Пярцоў адзначыў, што ў ходзе сустрэчы гатовы адказаць на ўсе пытанні, якія хочуць задаць удзельнікі. 
Фота газеты «Гродзенская праўда» — БЕЛТА
