Беларусь заключыла кантракты на пастаўку малочнай прадукцыі ў Азербайджан
Фота з архіва 8 кастрычніка, Мінск . Беларусь падпісала кантракты на пастаўку малочнай прадукцыі ў Азербайджан у час перагавораў беларускай дэлегацыі з прадстаўнікамі дзелавых колаў Азербайджана на пляцоўцы пасольства Беларусі ў Баку. Аб гэтым паведамілі ў прэс-службе Мінсельгасхарча.
Узначаліў беларускую дэлегацыю намеснік міністра сельскай гаспадаркі і харчавання Беларусі — дырэктар Дэпартамента ветэрынарнага і харчовага нагляду Іван Смільгінь. Па выніках сустрэчы дасягнуты шэраг канкрэтных дамоўленасцей, у тым ліку падпісаны кантракты на пастаўку малочнай прадукцыі ў Азербайджан. Бакі маюць намер прадоўжыць работу над пашырэннем таварнай наменклатуры і павелічэннем прысутнасці беларускіх брэндаў у рознічных сетках Азербайджана.
У мерапрыемстве прынялі ўдзел 11 беларускіх перапрацоўчых прадпрыемстваў. Азербайджанскі бок прадставілі 16 кампаній, у ліку якіх рознічная сетка магазінаў «Беларускі», буйнейшыя гандлёвыя сеткі краіны, вытворцы малочнай і кандытарскай прадукцыі, а таксама аптовыя пастаўшчыкі для гасцінічнага сегмента. Беларускія экспарцёры правялі прэзентацыю сваёй прадукцыі ў фармаце выстаўкі-дэгустацыі, што дало магчымасць азербайджанскім партнёрам ацаніць якасць і смакавыя характарыстыкі тавараў. У час асобных B2B-перагавораў бакі абмеркавалі лагістыку, цэнавыя ўмовы і аб’ёмы паставак.
