Мерапрыемствы фестывалю дакументальнага кіно краін СНД «Еўразія.DOC» стартавалі ў Мінску
Фота eurasia.film 1 кастрычніка, Мінск . У Мінску пачаліся мерапрыемствы X Міжнароднага фестывалю дакументальнага кіно краін СНД «Еўразія.DOC». Аб гэтым на прэс-канферэнцыі паведаміў выканаўчы дырэктар фестывалю, старшыня праўлення ГА «Беларускі саюз журналістаў» Андрэй Крывашэеў,
Акрамя паказаў, якія сёння пачнуцца ў кінатэатры «Перамога», адбудуцца некалькі ўнікальных падзей. «2 кастрычніка ў Беларускім дзяржаўным музеі гісторыі Вялікай Айчыннай вайны пройдзе круглы стол і адкрыты паказ фільма расійскіх калег, прысвечаны 85-годдзю з пачатку ВАВ і генацыду шматнацыянальнага савецкага народа. Тэма традыцыйна выклікае цікавасць ва ўсіх краінах — удзельніцах фестывалю», — сказаў Андрэй Крывашэеў.
Упершыню за гісторыю «Еўразія.DOC» арганізатары аб’яднаюць прафесійных гісторыкаў, якія працуюць з архівамі, якія займаюцца раскопкамі, і прадстаўнікоў сілавых органаў — Генеральнай пракуратуры, Следчага камітэта, Дзяржаўнага камітэта судовых экспертыз, якія займаюцца фактычным пацвярджэннем факта генацыду. «Пройдзе навукова-асветная канферэнцыя ў Інстытуце гісторыі НАН. Мэта — прыцягнуць як мага больш людзей да тэмы адстойвання гістарычнай праўды і памяці», — адзначыў выканаўчы дырэктар фестывалю.
У гэтым годзе арганізатары фестывалю падтрымалі маладзёжны рух. «2 кастрычніка ў БДАМ пройдзе фінал маладзёжнага конкурсу «Еўразія.DOC: 4 мінуты». Сёлета 14 фіналістаў, кожны з іх атрымае сваю аўдыторыю і ўвагу», — дадаў Андрэй Крывашэеў.
У час закрыцця фестывалю 2 кастрычніка ў кінатэатры «Беларусь» пераможцам уручаць прызы і спецыяльныя ўзнагароды.
Андрэй Крывашэеў звярнуў увагу, што фестываль традыцыйна бясплатны для ўдзельнікаў і абсалютна адкрыты для аўдыторыі. «Мы не проста паказваем фільмы — кожная тэма, узнятая дакументалістамі, абмяркоўваецца з публікай. Гэтым фестываль цікавы для вельмі ўдумлівых беларускіх гледачоў», — дадаў выканаўчы дырэктар.
Раней, 28 верасня, фестываль стартаваў у Смаленску. Дырэктар міжнароднага фестывалю дакументальнага кіно краін СНД «Еўразія.DOC» Валерый Шахаўцоў расказаў, што да маштабнага юбілейнага, 10-га фестывалю падышлі з вялікай адказнасцю. «Праект стаў вядомым на ўсёй еўразійскай прасторы. У ім удзельнічаюць людзі з самых розных краін: акрамя Расіі і Беларусі, гэта нашы сябры з Казахстана, Узбекістана, Кыргызстана, калегі з Кітая. У гэтым годзе прадстаўнік Малдовы трапіў у шорт-ліст фестывалю. Іранскі фільм ужо другі раз удзельнічае ў кароткай праграме. Мы адчулі, што гэты фестываль — асаблівы. Было пачуццё свята, прыўзнятасці», — расказаў ён.
X Міжнародны фестываль дакументальнага кіно краін СНД «Еўразія.DOC» праходзіць у Смаленску і Мінску з 28 верасня па 2 кастрычніка.
