Лукашэнка падзякаваў Пуціну за падтрымку Беларусі па сучасных відах узбраенняў
Аляксандр Лукашэнка 10 лістапада, Масква . Прэзідэнт Беларусі Аляксандр Лукашэнка на сустрэчы з Прэзідэнтам Расіі Уладзімірам Пуціным падзякаваў яму за падтрымку і дапамогу Беларусі па сучасных відах узбраенняў,
«Што датычыцца бяспекі, я дзякую, што вы трымаеце слова. Усё, што вы паабяцалі Беларусі ў плане бяспекі, мы асвоілі. Усе віды ўзбраенняў, самыя новыя. Вопыт, які ўвесь свет бачыць у канфлікце ва Украіне, мы таксама ўважліва вывучаем», — сказаў Аляксандр Лукашэнка.
«Сфарміравалі баявыя падраздзяленні — фактычна ад народнага апалчэння да Узброеных Сіл, арміі. Праводзім рэгулярныя праверкі, вы гэта бачыце. Таму магу толькі падзякаваць за падтрымку і дапамогу па сучасных відах узбраенняў, якія беларуская армія атрымлівае. У гэтым плане вы можаце не турбавацца», — падкрэсліў Прэзідэнт Беларусі. 
Беларускі лідар звярнуў увагу і на расійскія воінскія фарміраванні, сфарміраваныя на заходнім напрамку Саюзнай дзяржавы, адзначыўшы іх боегатоўнасць. «Фарміраванні, якія вы стварылі, на захадзе трымаеце на ўсякі выпадак, вельмі баяздольныя і гатовы абараняць Беларусь. Я вам удзячны за тое, што вы трымаеце ў баявой гатоўнасці гэтыя войскі, і пры ўсёй складанасці нейкіх пытанняў яны ніколі не накіроўваліся ў зону баявых дзеянняў ва Украіну. Гэта для нас вельмі важна», — канстатаваў ён.
Месцам сустрэчы кіраўнікоў дзяржаў стала падмаскоўная дзяржаўная рэзідэнцыя Нова-Агарова. 
Як паведамлялася , Прэзідэнт Беларусі Аляксандр Лукашэнка 10 лістапада прыбыў з рабочым візітам у Расійскую Федэрацыю. Сустрэча з Уладзімірам Пуціным адбылася напярэдадні сесіі Савета калектыўнай бяспекі Арганізацыі дагавора аб калектыўнай бяспецы, якая пройдзе 11 лістапада ў Маскве. Лідары краін абмяркуюць пытанні дзейнасці АДКБ, разгледзяць актуальныя праблемы міжнароднай і рэгіянальнай бяспекі.
У сваім выступленні Прэзідэнт Беларусі падрабязна спыніцца на пытаннях забеспячэння калектыўнай бяспекі на еўразійскай прасторы, прадставіць пазіцыю Мінска па ключавых напрамках развіцця арганізацыі.
