У Беларусі ўступілі ў сілу нормы аб крыптабанках і кантролі ў сферы лічбавых знакаў
Фота з архіва 18 ліпеня, Мінск . У Беларусі ўступілі ў сілу пастановы Нацбанка, якія датычацца крыптабанкаў і пытанняў кантролю ў сферы токенаў. Аб гэтым са спасылкай на ўпраўленне інфармацыі і грамадскіх сувязей Нацбанка.
Дакументы прыняты ў рамках рэалізацыі палажэнняў указа Прэзідэнта ад 16 студзеня 2026 года нумар 19 «Аб крыптабанках і асобных пытаннях кантролю ў сферы лічбавых знакаў (токенаў). У прыватнасці, размова ідзе аб пастанове нумар 157 «Аб зацвярджэнні рэгламентаў адміністрацыйных працэдур» і нумар 158 «Аб парадку вядзення рэестра крыптабанкаў Нацыянальнага банка». Яны ўстанаўліваюць форму і змест рэестра крыптабанкаў Нацбанка, парадак уключэння юрыдычнай асобы ў рэестр, унясення змяненняў у рэестр, выключэння крыптабанка з рэестра, а таксама парадак ажыццяўлення Нацыянальным банкам адносна акцыянерных таварыстваў, якія з’яўляюцца рэзідэнтамі Парка высокіх тэхналогій, адміністрацыйных працэдур па ўключэнні ў рэестр з атрыманнем пасведчання аб уключэнні ў рэестр, унясенні змяненняў або выключэнні з яго.
Пастановай нумар 162 зацверджана інструкцыя аб бухгалтарскім уліку лічбавых знакаў (токенаў) у крыптабанках, якая вызначае парадак адлюстравання ў бухгалтарскім уліку крыптабанкаў лічбавых знакаў (токенаў) і здзелак (аперацый) з імі, прадугледжаных палажэннем аб парадку ажыццяўлення крыптабанкамі дзейнасці з выкарыстаннем лічбавых знакаў (токенаў). Дакумент таксама ўстанаўлівае падыходы да прадстаўлення інфармацыі аб аперацыях з токенамі пры фарміраванні крыптабанкамі формы справаздачнасці «Бухгалтарскі баланс» і бухгалтарскай (фінансавай) справаздачнасці.
Пастановай нумар 163 устаноўлены парадак вызначэння крыптабанкам курсу лічбавых знакаў (токенаў) у беларускіх рублях. Дакументам прадугледжваюцца два падыходы да вызначэння курсу токенаў. Так, для токенаў, з якімі, згодна з рашэннем Наглядальнага савета ПВТ, крыптабанкі маюць права ажыццяўляць аперацыі, курс разлічваецца на падставе даных буйнейшых крыптабіржаў. Для токенаў, якія створаны рэзідэнтамі ПВТ і якія не абарачаюцца на ўказаных крыптабіржах, курс вызначаецца на аснове ўмоў дагавораў, што з’яўляюцца падставай набыцця, атрымання ў валоданне токенаў, а таксама на аснове лакальных прававых актаў крыптабанка.
У пералік крыптабіржаў, якія выкарыстоўваюцца для вызначэння рыначнага курсу токенаў, уключаны Binance, Bybit і OKX.
Пастановай праўлення Нацыянальнага банка ад 10 ліпеня нумар 167 вызначаны парадак выканання крыптабанкамі прудэнцыяльных патрабаванняў, мінімальны пералік дазволеных для ажыццяўлення крыптабанкам банкаўскіх аперацый.
Таксама ўнесены змяненні ў парадак фарміравання крэдытных гісторый і атрымання крэдытных справаздач. Шэраг змяненняў уступае ў сілу з 18 ліпеня.
«Крыптабанкі становяцца крыніцамі фарміравання крэдытных гісторый і абавязаны прадстаўляць звесткі ў Крэдытны рэгістр па ўсіх крэдытных здзелках за выключэннем здзелак, абавязацельства па якіх выражана ў лічбавых знаках (токенах). Пры гэтым у крэдытнай гісторыі будуць адлюстроўвацца звесткі аб тым, што абавязацельствы па крэдытнай здзелцы забяспечаны залогам лічбавых знакаў (токенаў)», — адзначылі ў Нацбанку.
У сваю чаргу крыптабанкам прадастаўляецца права атрымання крэдытных справаздач для ацэнкі рызык пры заключэнні крэдытных здзелак і ацэнкі плацежаздольнасці кліента.
