У Беларусі ўдасканальваюць парадак выканання функцый па апецы і папячыцельстве ў адносінах да недзеяздольных асоб
Фота з архіва 27 мая, Мінск . У Беларусі ўдасканальваецца парадак ажыццяўлення функцый па апецы і папячыцельстве ў адносінах да асоб, прызнаных недзеяздольнымі і абмежавана дзеяздольнымі. Адпаведную пастанову падпісаў прэм’ер-міністр Беларусі Аляксандр Турчын, паведамілі БЕЛТА ў прэс-службе ўрада.
У новай рэдакцыі выкладаюцца палажэнне аб парадку кіравання маёмасцю падапечных і інструкцыя аб парадку ўзаемадзеяння дзяржаўных органаў і арганізацый пры прыняцці рашэнняў аб дачы згоды на адчужэнне або аб адмове ў адчужэнні жылых памяшканняў.
Што датычыцца палажэння аб парадку кіравання маёмасцю падапечных, вызначаецца парадак і тэрмін назначэння апекуна над маёмасцю. Калі маёмасць падапечнага знаходзіцца ў іншай мясцовасці, то ахова гэтай маёмасці ажыццяўляецца па месцы яе знаходжання. Для забеспячэння захаванасці маёмасці мясцовы выканкам сваім рашэннем можа назначыць апекуна над маёмасцю. Ён назначаецца на працягу месяца з дня атрымання звестак аб маёмасці падапечнага.
Акрамя таго, пашыраецца пералік расходаў, якія могуць ажыццяўляць кіраўнікі сацыяльных пансіянатаў за кошт сродкаў пражываючых у іх падапечных. Напрыклад, за кошт сродкаў падапечных можна будзе аплаціць рамонт абсталявання і прадметаў, якія належаць падапечнаму, паслугі мабільнай сувязі, аформіць падпіскі на часопісы і газеты, правесці расходы па выплаце падаткаў, збораў, пошлін, аплату ЖКП у адносінах да іх маёмасці і інш.
Уводзіцца права на кампенсацыю расходаў за час знаходжання падапечнага ў «дамашнім водпуску» асобе, якая ўзяла на сябе абавязацельства па ўтрыманні падапечнага ў дамашніх умовах. У прыватнасці, у выпадку прадастаўлення падапечнаму, які пражывае ў сацыяльным пансіянаце, «дамашняга водпуску» тэрмінам больш за адзін месяц, расходы ў памеры 90 працэнтаў пенсіі падапечнага кампенсуюцца асобе, у якой ён пражывае. Выплата будзе ажыццяўляцца дырэктарам сацыяльнага пансіяната прапарцыянальна тэрміну часовага выбыцця падапечнага не пазней за месячны тэрмін пасля яго вяртання ва ўстанову.
Таксама спрашчаецца справаздачнасць для апекуна, папячыцеля. Выключаецца абавязак апекуна, папячыцеля па прадастаўленні чэкаў на набыццё прадуктаў харчавання, лякарстваў, прадметаў першай неабходнасці, аплаты плацяжоў за кошт бягучых паступленняў падапечных. Апякун, папячыцель прадастаўляе да справаздачы толькі дакументы, якія пацвярджаюць расходы, ажыццёўленыя з папярэдняга пісьмовага дазволу органа апекі і папячыцельства (напрыклад, ад продажу маёмасці, здачы ў арэнду, наём і інш.).
У прэс-службе ўрада таксама растлумачылі змяненні ў інструкцыі аб парадку ўзаемадзеяння дзяржаўных органаў і арганізацый пры прыняцці рашэнняў аб дачы згоды на адчужэнне або аб адмове ў адчужэнні жылых памяшканняў. Так, падзелены паўнамоцтвы за падрыхтоўку праектаў рашэнняў мясцовых органаў улады аб дачы згоды на адчужэнне або аб адмове ў адчужэнні жылых памяшканняў. Калі ў жылым памяшканні пражываюць непаўналетнія дзеці — такія рашэнні афармляюцца ўпраўленнямі адукацыі. Калі ў жылым памяшканні пражываюць паўналетнія асобы, прызнаныя недзеяздольнымі або абмежавана дзеяздольнымі, — органамі сацыяльнай абароны.
Уносяцца змяненні ў палажэнне аб органах апекі і папячыцельства (пастанова ўрада ад 28 кастрычніка 1999 года нумар 1676). Размеркаваны функцыі паміж ТЦСАН і структурнымі падраздзяленнямі ЖКГ па апецы і папячыцельстве ў адносінах да маёмасці падапечных. ТЦСАН выяўляюць, вядуць улік маёмасці, забяспечваюць захоўванне рухомай маёмасці, а таксама праводзяць абследаванні рухомай маёмасці. Структурныя падраздзяленні ЖКГ забяспечваюць захоўванне нерухомай маёмасці і праводзяць яе абследаванне. Абследаванне праводзіцца не радзей як адзін раз у год.
Замацаваны паўнамоцтвы мясцовых выканаўчых і распарадчых органаў па прыняцці мер па выкарыстанні нерухомай маёмасці (здачы ў наём, арэнду, правядзенні рамонтных работ, прызнанні жылых памяшканняў непрыдатнымі для пражывання і інш.).
Пашыраны паўнамоцтвы структурных падраздзяленняў мясцовых органаў улады ў сферы аховы здароўя, вызначаны тэрміны. На іх ускладзены абавязкі па забеспячэнні праходжання кандыдатамі ў апекуны, папячыцелі медыцынскага агляду на працягу сямі рабочых дзён, а пры правядзенні дадатковай дыягностыкі — на працягу 15 рабочых дзён; інфармаванні ўпраўленняў па працы, занятасці і сацыяльнай абароне, ТЦСАН аб ініцыяванні прызнання грамадзяніна недзеяздольным, абмежавана дзеяздольным — на працягу сямі рабочых дзён з даты падачы заявы ў суд, аб выяўленых медыцынскімі работнікамі фактах невыканання, неналежнага выканання апекуном, папячыцелем ускладзеных на іх абавязкаў — не пазней за два рабочыя дні з даты выяўлення медыцынскімі работнікамі такіх фактаў.
Карэкціруецца прыкладнае палажэнне аб каардынацыйным савеце па пытаннях апекі і папячыцельства над паўналетнімі асобамі (пастанова ўрада ад 24 чэрвеня 2020 года нумар 368) у частцы мэт, задач каардынацыйнага савета і замацавання перыядычнасці правядзення пасяджэнняў.
Пастанова ўступае ў сілу пасля яе афіцыйнага апублікавання.
