XXXII Мінскі міжнародны кінафестываль «Лістапад» адкрыўся ў кінатэатры «Масква»
30 кастрычніка, Мінск . У кінатэатры «Масква» стартаваў ХХХІІ Мінскі міжнародны кінафестываль «Лістапад»,
Кінафестываль пачаўся адначасова ва ўсіх гарадах-удзельніках. Яго адкрые беларуска-расійскі фільм «Бацька Мінай. Партызанская легенда» (сумесная вытворчасць студый «Беларусьфільм» і «ВаенФільм»), які раскажа гісторыю Героя Савецкага Саюза, беларускага партызана Міная Шмырова. Рэжысёрам карціны выступіў народны артыст Расіі Ігар Угольнікаў, які ўдзельнічаў у стварэнні фільмаў «У жніўні 41-га» і «Брэсцкая крэпасць».
Усяго прадставяць восем конкурсных праграм (ігравое, неігравое, анімацыйнае кіно, фільмы для дзіцячай і юнацкай аўдыторыі «Лістападзік», «Кіно маладых», кароткаметражныя фільмы, конкурс нацыянальных кінашкол і нацыянальны конкурс). Паказы пройдуць у кінатэатрах «Масква», «Беларусь», «Цэнтральны», «Перамога», «Піянер».
У склад журы ўвайшлі вядомыя дзеячы і вядучыя эксперты ў галіне кіно міжнароднага класа.
Гледачоў і ўдзельнікаў свята кіно таксама парадуе пазаконкурсная праграма. У кінатэатры «Масква» адбудзецца вечар памяці беларускага рэжысёра Віктара Турава. Тут пройдуць таксама Дні нацыянальнага кіно Беларусі, Расіі, Індыі, Казахстана, Кітая. У кінатэатры «Перамога» — Дні нацыянальнага кіно Пакістана. У Год беларускай жанчыны паказы будуць прысвечаны жаночаму погляду на кінематограф. Глядач убачыць фільмы, створаныя рэжысёрамі-жанчынамі або прысвечаныя гераіням з цікавым лёсам.
На базе Акадэміі мастацтваў, кінастудыі «Беларусьфільм» і БДУКМ пройдуць творчыя сустрэчы, майстар-класы з гасцямі і ўдзельнікамі кінафестывалю: вядомымі прадзюсарамі, рэжысёрамі і акцёрамі з Беларусі, Расіі, Італіі, Грузіі, Узбекістана. Беларуская моладзь зможа пераняць перадавы вопыт лепшых кінематаграфістаў.
У праграме таксама круглы стол па пытаннях супрацоўніцтва Беларусі і Расіі ў галіне вытворчасці і пракату фільмаў, арганізаваны пад эгідай і патранатам Пастаяннага камітэта Саюзнай дзяржавы ў Нацыянальнай бібліятэцы Беларусі, і круглы стол кіраўнікоў і прадстаўнікоў устаноў адукацыі краін СНД па пытаннях развіцця кінаадукацыі на тэрыторыі Садружнасці.
XXXII Мінскі міжнародны кінафестываль «Лістапад» праходзіць у Беларусі з 30 кастрычніка па 6 лістапада пад лозунгам «Глядзі. Жыві. Цані». Для ўдзелу было пададзена больш за 3,3 тыс. заявак са 108 краін, адабрана 130 фільмаў з 55 краін. На «Лістападзе» традыцыйна прадстаўлены работы ўдзельнікаў з Расіі, Кітая, Індыі, Ірана і Пакістана, В’етнама. Таксама будуць работы з Камбоджы, Марока, Эквадора, Венесуэлы, Калумбіі, Кубы, ЗША, Танзаніі, Мексікі, Аргенціны, М’янмы.
Фота Андрэя Сіняўскага
