Выстава работ Нікаса Сафронава адкрылася ў фестывальным Віцебску
14 ліпеня, Віцебск . Выстава «За мяжой бачнага. Сусветы Нікаса Сафронава» адкрылася ў канцэртнай зале «Віцебск»,
Першы раздзел выставы народнага мастака Расіі прысвечаны Вялікай Айчыннай вайне, на карцінах можна ўбачыць вядомыя помнікі, мемарыялы і знакавыя мясціны, звязаныя з падзеямі тых гадоў. Памяць аб іх стала часткай культурнага кода некалькіх пакаленняў. Слава пакалення пераможцаў перадаецца моладзі праз сямейныя гісторыі, літаратуру, жывапіс, кіно.
Пейзажы прадстаўлены ў другой частцы выставы. Мастак перадае свой погляд на штодзённасць, у іх ёсць свая паэзія. Напрыклад, ад палатна «Зіма ў вёсцы» так і павявае прыемнай прахалодай, пахам дыму, а пры поглядзе на павозку, што рухаецца паміж хаткамі, здаецца, быццам скрыпіць снег пад палазамі. «Сонечны дзень недзе ў Італіі» акунае ў атмасферу міжземнаморскага ўзбярэжжа. 
Яшчэ адзін свет майстра — унутраны, той, у якім жывуць ідэі, вобразы і музы, якія даюць натхненне. Гэта частка выставы дапамагае адчуць стан, калі на мяжы сну і абуджэння ўзнікаюць незвычайныя, маляўнічыя, хаця і некалькі размытыя, уяўленні. 
Нікас Сафронаў прапануе гледачам ступіць у бясконцасць космасу і стаць пакарыцелем пазаземнай прасторы. Мастак паказвае імкненне чалавецтва наблізіцца да таямніц сусвету, даследаваць новыя гарызонты. Сярод экспанатаў ёсць карціны, якія пабывалі на Міжнароднай касмічнай станцыі. 
Выставу можна наведаць бясплатна, яна размешчана на трэцім паверсе КЗ «Віцебск».
Фота Аляксандра Хітрова
