В2В-перагаворы, рэкламны тур для блогераў. Што арганізуюць на беларуска-кітайскім турыстычным форуме
Фота з архіва 13 кастрычніка, Брэст . Больш за 150 чалавек прымуць удзел у беларуска-кітайскім турыстычным форуме, які пройдзе ў Брэсце 19-22 кастрычніка. Аб гэтым паведамілі арганізатары.
Брэст на некалькі дзён стане пляцоўкай для сустрэч афіцыйных і дзелавых колаў, спецыялістаў профільных асацыяцый, тураператараў, атэльераў, журналістаў і трэвэл-блогераў. Чакаецца, што да форуму далучацца прадстаўнікі кітайскіх правінцый Хубэй, Шаньсі, Шэньсі, Хунань, Хэбэй, Цзянсі, Хэнань, а таксама з Урумчы, Сіндзян-Уйгурскага аўтаномнага раёна.
«На гэты момант аб сваім удзеле ўжо заявілі каля 45 прадстаўнікоў Кітая, пачынаючы ад тураператараў, спецыялістаў сферы гасціннасці, экспертаў па стварэнні China Friendly асяроддзя. Плануецца прыбыццё чатырох кітайскіх блогераў з вялікім ахопам аўдыторыі», — расказаў намеснік старшыні Брэсцкага аблвыканкама Міхаіл Бацэнка.
У час форуму адбудуцца панэльныя дыскусіі, B2B-перагаворы, падпісанне мемарандумаў. Будуць працаваць зоны гасціннасці з інтэрактывам. Спецыялісты абмяркуюць ключавыя тэмы для супрацоўніцтва. Брэсцкая вобласць прэзентуе свае маршруты і топавыя славутасці. Будуць узняты пытанні падрыхтоўкі кадраў, лагістыкі, турыстычнай інфраструктуры, выкарыстання лічбавізацыі ў індустрыі.
Акрамя гэтага, пройдзе рэкламны тур па папулярных турыстычных аб’ектах: удзельнікі пабываюць у Косаўскім палацы, нацыянальным парку «Белавежская пушча», мемарыяльным комплексе «Брэсцкая крэпасць-герой» і аграсядзібах, прадэгустуюць стравы беларускай кухні.
Кітайскія турысты актыўна падарожнічаюць, іх асабліва прывабліваюць інстаграм-лакацыі з ваў-эфектам. Асобна ў гэтым пераліку стаіць прыродная прыгажосць. «Адна Белавежская пушча чаго варта! У Кітаі няма такіх лясоў. Калі ў пушчу прыязджаў губернатар правінцыі Ляанін, ён проста сеў на лавачку і глядзеў на возера, назіраў за прыродай. Кітайскіх турыстаў даволі цяжка здзівіць, але нам ёсць чым», — не сумняваецца Міхаіл Бацэнка. Да форуму выпусцяць турыстычны даведнік з перакладам на кітайскую мову. Адкрыць яго можна будзе і праз QR-код.
Арганізатарамі форуму выступаюць Брэсцкае аддзяленне гандлёва-прамысловай палаты і Брэсцкі аблвыканкам пры падтрымцы Нацыянальнага агенцтва па турызме, пасольстве Беларусі ў Кітаі, Рэспубліканскага саюза турыстычных арганізацый.
