Турпаток ва Узбекістан з Беларусі за студзень-май павялічыўся на 9,7 працэнта
Фота з архіва 14 ліпеня, Мінск . Беларусы сталі часцей падарожнічаць ва Узбекістан, паведамілі ў Рэспубліканскім саюзе турыстычных арганізацый (РСТА).
«Турыстычныя сувязі актыўна развіваюцца. Так, за першыя пяць месяцаў гэтага года Узбекістан з турыстычнымі мэтамі наведаў 14 251 грамадзянін Беларусі. Паказчык павялічыўся на 9,7 працэнта ў параўнанні з аналагічным перыядам мінулага года», — расказалі ў РСТА.
Беларусаў прываблівае багатая культурная спадчына, старадаўнія гарады Шаўковага шляху, архітэктура, напрамкі, звязаныя з экатурызмам, кухня. Садзейнічаюць паездкам прамыя авіязносіны — тры рэгулярныя рэйсы «Белавія» на тыдзень даюць магчымасць ажыццяўляць як кароткатэрміновыя туры, так і працяглыя падарожжы.
«Узбекістан ужо даволі развіты для камфортнага падарожжа, але яшчэ не страціў адчування сапраўднага адкрыцця, — адзначаюць спецыялісты. — Тут старадаўнія гарады Вялікага шаўковага шляху спалучаюцца з новай інфраструктурай, скораснымі паяздамі, сучаснымі атэлямі, культурнымі падзеямі, горнымі маршрутамі і ўсходняй гасціннасцю».
Што датычыцца падарожнікаў з Узбекістана, то за пяць месяцаў з турыстычнымі мэтамі Беларусь наведаў 1101 грамадзянін Узбекістана. «Гэта няшмат, але лічба вырасла ледзь не з нуля», — адзначылі ў РСТА.
