Старадаўнія ўпрыгажэнні і трэнды сезона. У Александрыі паказалі анталогію жаночай прыгажосці
11 ліпеня, Александрыя . Археалагічныя знаходкі тысячагадовай даўнасці і сучасныя калекцыі беларускіх вытворцаў — выставачны праект «Анталогія жаночай прыгажосці: ад традыцый да сучаснасці» дэманструе ў Александрыі ўсю глыбіню і разнастайнасць жаночага вобраза Магілёўшчыны,
Выстаўка стала своеасаблівым мостам паміж эпохамі. З аднаго боку, наведвальнікі могуць убачыць сапраўдныя артэфакты: скроневыя кольцы, фібулы і падвескі, якія насілі жанчыны ў старажытнасці. З другога — азнаёміцца з рэканструкцыямі касцюмаў XVIII-XIX стагоддзяў і ацаніць сучасныя вырабы ад лепшых фабрык канцэрна «Беллегпрам».
Дырэктар Магілёўскага абласнога краязнаўчага музея імя Е.Р.Раманава Яўген Белавусаў адзначыў, што экспазіцыя ахоплівае ўсе гістарычныя перыяды развіцця традыцыйнага аблічча беларускай жанчыны. «Наш музей сёння працуе на свяце ў складзе агульнай пляцоўкі. Наш блок прысвечаны непасрэдна традыцыям беларусаў, а менавіта жаночым строям і элементам адзення. Мы пачынаем расказ са старажытнасці, прадстаўляючы археалагічныя артэфакты і старадаўнія ўпрыгажэнні. Далей пераходзім да беларускага нацыянальнага касцюма. Тут прадстаўлены ўсе рэгіёны Магілёўскай вобласці, і праз характэрныя тэрытарыяльныя рысы мы паказваем нашым наведвальнікам унікальнасць кожнага кутка краю», — расказаў ён.
Загадчыца аддзела этнаграфіі музея Святлана Рыбакова растлумачыла, што для выстаўкі былі адабраны лепшыя ўзоры з калекцый устаноў культуры ўсёй вобласці. Галоўная задача арганізатараў — паказаць разнастайнасць мясцовых традыцый. «Мы паставілі задачу паказаць традыцыйны касцюм Магілёўшчыны ва ўсёй яго рэгіянальнай разнастайнасці. Тут можна ўбачыць розныя строі. Строй — гэта ўбор пэўнага рэгіёна, у які могуць уваходзіць касцюмы некалькіх раёнаў. Напрыклад, у Магілёўскі строй уваходзяць уяўленні аб касцюмах Магілёўскага, Слаўгарадскага, Быхаўскага і Чавускага раёнаў. Дубровенскі строй аб’ядноўвае Горацкі і Мсціслаўскі раёны. А самы шырокі і цікавы — Краснапольскі строй, куды ўваходзяць касцюмы Краснапольскага, Касцюковіцкага, Хоцімскага, Клімавіцкага і Крычаўскага раёнаў. Усе строі даволі блізкія, але маюць яркія асаблівасці», — адзначыла яна.
Акрамя гістарычнай часткі, выстаўка насычана прадукцыяй сучасных беларускіх вытворцаў «Беллегпрама». Свае калекцыі прапанавалі фабрыкі з розных куткоў краіны. Так, прадпрыемства з Гродна прывезла сваю прадукцыю і паказала летнія навінкі.
“Мы ўжо 28 гадоў прыбіраем і ўпрыгожваем беларускіх жанчын і будзем прадаўжаць гэта рабіць. Наша гандлёвая сетка прадстаўлена ва ўсіх буйных гарадах, уключаючы Мінск, Магілёў, Віцебск, Гомель і Гродна. Мы прапануем прыгожыя сукенкі, дзелавыя касцюмы, верхняе адзенне, паліто, трэнчы і жакеты. У новай летняй калекцыі шмат вырабаў з шыфону, лёну, бавоўны і штапелю», — расказалі прадстаўнікі вытворцы. 
Фота Алега Файніцкага
