Інтэлектуальны фундамент краіны. У Мінску ўручылі дзяржузнагароды педагогам, студэнтам і курсантам
25 чэрвеня, Мінск . Прэм’ер-міністр Аляксандр Турчын па даручэнні Прэзідэнта ўручыў дзяржаўныя ўзнагароды педагагічным работнікам, студэнтам і курсантам,
Падзякі Прэзідэнта прэм’ер-міністр уручыў выкладчыкам устаноў вышэйшай адукацыі за значны асабісты ўклад у падрыхтоўку высокакваліфікаваных спецыялістаў і развіццё творчых здольнасцей таленавітай моладзі. Таксама адзначаны студэнты і курсанты, якія ўжо на этапе навучання прадэманстравалі выдатныя вынікі ў навуцы, творчасці і грамадскай дзейнасці.
«У гэтым годзе больш як 45 тыс. выпускнікоў папоўняць рады маладых людзей з вышэйшай адукацыяй. Гэта інтэлектуальны фундамент нашай краіны. Менавіта вы з’яўляецеся рухавіком тэхналагічнага прагрэсу, а значыць, эканомікі ў цэлым. Без адукаванай моладзі ў дзяржавы няма будучыні. І гэта фраза зусім не клішэ. Менавіта вы, маладое пакаленне, заўтра падхопіце эстафету кіравання краінай і будзеце прымаць жыццёва важныя рашэнні. На вас ляжа адказнасць за лёс дзяржавы і дабрабыт народа», — сказаў Аляксандр Турчын.
Паводле яго слоў, інвестыцыі ў адукацыю моладзі самыя выгадныя: гэта ўклад у доўгатэрміновую бяспеку і суверэнітэт краіны. «Сёння вы стаіце на парозе самастойнага жыцця. Перад вамі адкрыты ўсе дарогі. Заўсёды памятайце: вы патрэбны сваёй краіне. Кропак прыкладання шмат, галоўнае — знайсці сябе. Не бойцеся памыляцца, верце ў свае сілы і веды. Самы цяжкі экзамен — не той, што ў заліковай кніжцы. Жыццё прынясе нямала выпрабаванняў. Але ўменне думаць, самаўдасканальвацца, працаваць у камандзе, адказнасць і працавітасць дапамогуць іх пераадолець», — звярнуўся ён да студэнтаў і курсантаў.
Асаблівыя словы падзякі кіраўнік урада адрасаваў педагогам за ўклад у навучанне і выхаванне маладога пакалення. «Вашы, дарагія выпускнікі, поспехі — гэта вынік не толькі асабістых намаганняў, але і заслуга настаўнікаў. Сёння ў ВНУ краіны 17 тыс. выкладчыкаў перадаюць моладзі веды, дапамагаюць у асобасным росце і прафесійным станаўленні. Гэта праца бясцэнная, — падкрэсліў Аляксандр Турчын. — Упэўнены, што сённяшняя ўзнагарода стане для ўсіх нас не толькі прызнаннем дасягнутых вынікаў, але і стымулам да новых здзяйсненняў». 
Прафесар кафедры акушэрства і гінекалогіі з курсам павышэння кваліфікацыі і перападрыхтоўкі Гомельскага дзяржаўнага медыцынскага ўніверсітэта Юлія Лызікава адзначыла, што Падзяка Прэзідэнта — першая ўзнагарода ў яе жыцці. «Гэта вельмі хвалююча і каштоўна. Я вельмі ганаруся гэтай узнагародай. Таксама я была лаўрэатам, атрымлівала стыпендыю як малады вучоны, як малады прафесар, — расказала яна. — Калі я даведалася, для мяне гэта быў вялікі гонар і вялікая радасць. Але хачу сказаць, што гэта радасць не толькі для мяне, але і для маёй сям’і, майго ўніверсітэта, майго горада. Гэта вялікае дасягненне, і я вельмі ганаруся гэтай узнагародай». 
Прафесар кафедры біялогіі Гомельскага дзяржаўнага ўніверсітэта імя Францыска Скарыны Андрэй Цурыкаў у сваю чаргу адзначыў, што да педагагічнай і навуковай работы прыкавана вялікая ўвага. «Увага і падтрымка адчуваюцца на працягу ўсяго майго жыцця. Падтрымка і дзяржавы, і ў першую чаргу Прэзідэнта. За ўвесь час я быў тройчы ўдастоены стыпендыі Прэзідэнта, будучы аспірантам, і двойчы як малады вучоны. А наша студэнцкая навукова-даследчая лабараторыя «Флора і расліннасць» атрымала падтрымку Спецыяльнага фонду Прэзідэнта па падтрымцы адораных навучэнцаў і студэнтаў у 2020 годзе. Дзякуючы гэтаму была створана самая сучасная лабараторыя, дзе мы вывучаем генетычныя аспекты розных арганізмаў. Для студэнтаў гэта вельмі важна. Яны таксама адчуваюць гэту падтрымку, яна іх вельмі матывуе і прыцягвае ў нашы сцены многіх маладых талентаў», — звярнуў увагу ён. 
Курсант чацвёртага курса факультэта падрыхтоўкі афіцэрскіх кадраў Інстытута пагранічнай службы Марыя Шыдлоўская ўпэўнена, што гэта падзяка не проста ацэнка вучобы, але і прызнанне працы ўсяго інстытута, пагранічнай службы, афіцэраў, выкладчыкаў. «Гэта не проста гонар, але і вялікая адказнасць. Для мяне гэта не фінальная прамая, а стартавы імпульс для далейшага развіцця, — сказала яна. — Цяпер усё больш дзяўчат ідзе ў гэту сферу. Усё ж гэта паважаная прафесія. І, у прынцыпе, у рамках пагранічнага кантролю яна дае магчымасць дзяўчатам праявіць сябе, асабліва там, дзе патрэбны ўважлівасць і ўседлівасць. Дзяўчаты добра спраўляюцца з гэтай работай. Мы трымаем узровень, мы вынослівыя, трывалыя. І нас усё больш заўважаюць. Мы ўжо можам годна выконваць задачы па ахове дзяржаўнай граніцы». 
Фота Мікалая Пятрова
