Сергяенка азнаёміўся з будаўніцтвам аграгарадка ў Карабаху па беларускіх тэхналогіях
Фота Палаты прадстаўнікоў Нацыянальнага сходу Рэспублікі Беларусь 14 кастрычніка, Мінск . Старшыня Палаты прадстаўнікоў Ігар Сергяенка ў ходзе рабочага візіту ў Азербайджан азнаёміўся з будаўніцтвам аграгарадка ў Карабаху па беларускіх тэхналогіях, са спасылкай на прэс-службу Палаты прадстаўнікоў.
У сяле Гызыл Кенгерлі, якое размешчана ў Агдамскім раёне, разгортваецца маштабная будоўля аграгарадка будучыні больш чым на 400 жылых дамоў з дзіцячым садам, школай і агракомплексам. Беларускія спецыялісты пераносяць свой вопыт стварэння аграгарадкоў на карабахскую зямлю.
Спікеру далажылі аб выніках рэалізацыі праекта, які стаў вынікам дамоўленасцей лідараў дзвюх краін. Ідэя аб магчымым удзеле беларусаў у аднаўленні сяла, якое пацярпела ад ваенных дзеянняў, узнікла ў маі 2024 года ў час візіту Прэзідэнта Беларусі Аляксандра Лукашэнкі ў Азербайджан.
У час рабочага візіту Ігар Сергяенка наведаў Агдамскі прамысловы парк, дзе азнаёміўся з патэнцыялам пляцоўкі і перспектывамі кааперацыі.
Таксама адбылося наведванне Карабахскага ўніверсітэта. Тут Ігара Сергяенку сустрэў рэктар ВНУ Шахін Байрамаў. Спікеру паказалі, як з нуля ствараўся гэты адукацыйны хаб, якімі тэхналогіямі аснашчаны новыя лабараторыі і як тут куецца кадравая будучыня рэгіёна.
У прэс-службе адзначылі, што паміж ВНУ Беларусі і Азербайджана наладжаны эфектыўны дыялог. Вядучыя ўніверсітэты дзвюх краін звязаны прамымі пагадненнямі ад медыцыны да IT. Па лініі акадэмій навук дзвюх краін паспяхова рэалізавана больш за 30 буйных сумесных праектаў.
Раней Ігар Сергяенка наведаў Гянджынскі аўтамабільны завод. Кааперацыя гэтага гіганта з МТЗ і МАЗам — адзін з самых паспяховых і ўзорных праектаў дзвюх краін. Фундамент прамысловай дружбы закладваўся яшчэ ў кастрычніку 2006 года ў час візіту Прэзідэнта Азербайджана Ільхама Аліева ў Мінск. На магутнасцях Гянджынскага аўтазавода за 2007-2025 гады сабрана ўжо каля 15 тыс. беларускіх трактароў. Паралельна ідзе зборка спецыяльнай пажарнай і камунальнай тэхнікі на базе шасі МАЗ з выкарыстаннем перадавых тэхналогій ад беларускага прадпрыемства «Пажзаб».
Як паведамлялася, старшыня Палаты прадстаўнікоў Ігар Сергяенка знаходзіцца з рабочым візітам у Азербайджане, дзе па даручэнні Прэзідэнта Беларусі Аляксандра Лукашэнкі прыме ўдзел у 7-м саміце Нарады па ўзаемадзеянні і мерах даверу ў Азіі (НУМДА).
