Рыжанкоў прапанаваў выкарыстоўваць вопыт Саюзнай дзяржавы для абнаўлення сістэмы бяспекі ў свеце
Максім Рыжанкоў 15 чэрвеня, Мінск . Свету патрэбна новая сістэма гарантавання бяспекі, і ў гэтым сэнсе Беларусь і Расія гатовы дзяліцца сваім вопытам выбудоўвання супрацоўніцтва ў рамках Саюзнай дзяржавы. Аб гэтым міністр замежных спраў Беларусі Максім Рыжанкоў заявіў журналістам па выніках перагавораў з кіраўніком МЗС Расіі Сяргеем Лаўровым,
Міністр са шкадаваннем адзначыў, што геапалітычная нестабільнасць у розных рэгіёнах і разнастайных праяўленнях стала прывычным фонам сустрэч кіраўнікоў знешнепалітычных ведамстваў дзвюх краін. «Трагічныя падзеі ва Украіне, на Блізкім Усходзе, у Венесуэле, Іране пацвярджаюць, што свету неабходна новая сістэма бяспекі, заснаваная на раўнапраўі, узаемнай павазе і даверы, — заявіў Максім Рыжанкоў. — Без адказнага дыялогу мы рызыкуем скаціцца ў новую гонку ўзбраенняў, якая можа стаць для чалавецтва апошняй».
Кіраўнік МЗС выказаў упэўненасць у тым, што мадэль беларуска-расійскага ўзаемадзеяння можа паслужыць кропкай росту для стабільнай сістэмы міжнародных адносін у Еўразіі. «За больш чым тры дзесяцігоддзі інтэнсіўнага адкрытага дыялогу нашым краінамі на фоне відавочных адрозненняў у эканамічным і ваенным патэнцыяле ўдалося выбудаваць эфектыўныя механізмы ўзаемнага ўліку нацыянальных інтарэсаў, стварыць рабочую сістэму агульнай непадзельнай бяспекі, а галоўнае — за кошт усяго гэтага забяспечыць рост дабрабыту нашых грамадзян. Менавіта гэтыя апрабаваныя на ўласным вопыце прынцыпы і падыходы мы прапаноўваем ў якасці асновы для ўрэгулявання крызісу ў рэгіёне, выбудоўвання абноўленай сістэмы еўразійскай і глабальнай бяспекі», — сказаў міністр.
Паводле яго слоў, менавіта трансгранічны гандаль, кааперацыя, інвестыцыі (у адрозненне ад гонкі ўзбраенняў і ўзвядзення агароджаў) прыносяць карысць не ваенна-прамысловым элітам, а ўсяму насельніцтву Еўразіі.
Максім Рыжанкоў расказаў, што ў час перагавораў з расійскім калегам яны абмяняліся думкамі аб актуальных тэмах сусветнай палітыкі, абмеркавалі асаблівасці выбудоўвання адносін з трэцімі дзяржавамі і блокамі, удзялілі асаблівую ўвагу глабальнай, рэгіянальнай сітуацыі ў сферы бяспекі, санкцыйнай праблематыцы, перагаворнаму працэсу па Еўразійскай хартыі разнастайнасці і шматпалярнасці ў XXI стагоддзі. 
Фота Віталя Піваварчыка
