Попыт на беларускую прадукцыю на расійскім рынку дзяржзакупак захоўваецца — старшыня Маскоўскай гарадской думы
26 чэрвеня, Мінск . Попыт на беларускую прадукцыю на расійскім рынку дзяржаўных і муніцыпальных закупак захоўваецца. Аб гэтым сказаў старшыня Маскоўскай гарадской думы Аляксей Шапашнікаў у час сустрэчы з удзелам кіраўнікоў мясцовых органаў улады Беларусі і органаў дзяржаўнай улады суб’ектаў РФ, якая прайшла ў час XIII Форуму рэгіёнаў Беларусі і Расіі,
«Расія і Беларусь выбудавалі шмат у чым падобныя сістэмы рэгулявання дзяржзакупак. Яны грунтуюцца на агульных прынцыпах права Еўразійскага эканамічнага саюза, адкрытасці, празрыстасці, забеспячэнні канкурэнцыі і лічбавізацыі працэдур. Нягледзячы на створаныя ў рамках Саюзнай дзяржавы і ЕАЭС умовы для роўнага ўдзелу пастаўшчыкоў у закупачных працэдурах, патэнцыял удзелу беларускіх кампаній у расійскіх закупках рэалізаваны не ў поўнай меры. Па выніках 2025 года ў адзіным рэестры ўдзельнікаў закупак Расійскай Федэрацыі было зарэгістравана крыху больш за 200 беларускіх кампаній. Пры гэтым патэнцыял супрацоўніцтва значна вышэйшы», — адзначыў Аляксей Шапашнікаў. 
Так, толькі заказчыкамі Масквы была закуплена прадукцыя з Беларусі на суму больш як 3,6 млрд расійскіх рублёў. Сярод пастаўленых тавараў такія пазіцыі, як лекавыя сродкі, медыцынскае абсталяванне, камунальная спецтэхніка і транспарт для ратавальных службаў. «Названыя даныя сведчаць аб попыте на беларускую прадукцыю на расійскім рынку дзяржаўных і муніцыпальных закупак. Але адначасова яны паказваюць і іншае. Пры наяўнасці попыту і ўзаемнай зацікаўленасці захоўваюцца адміністрацыйныя, тэхнічныя і прававыя бар’еры, якія перашкаджаюць у поўнай меры раскрыць патэнцыял супрацоўніцтва», — падкрэсліў старшыня Маскоўскай гарадской думы. 
Ён адзначыў, што ключавая задача — убраць канкрэтныя бар’еры, якія перашкаджаюць кампаніям дзвюх краін карыстацца ўжо створанымі інтэграцыйнымі магчымасцямі. У сувязі з гэтым з’яўляецца мэтазгодным засяродзіцца на паслядоўнай гарманізацыі найбольш адчувальных элементаў сістэмы закупак. Перш за ўсё размова ідзе аб сінхранізацыі расійскіх і беларускіх дзяржаўных інфармацыйных сістэм закупак.
Другі напрамак — узаемнае прызнанне звестак аб вопыце выканання кантрактаў і аўтаматычны абмен такімі данымі паміж нацыянальнымі сістэмамі. Акрамя таго, неабходна забяспечыць паўнацэннае функцыянаванне адзінага механізма прызнання незалежных банкаўскіх гарантый і фарміраванне адзінай прасторы фінансавага забеспячэння закупак Саюзнай дзяржавы.
«Рэалізацыя гэтых мер дасць магчымасць істотна пашырыць удзел беларускіх кампаній у расійскіх закупках, павысіць канкурэнцыю, знізіць адміністрацыйныя выдаткі і стварыць больш эфектыўную адзіную эканамічную прастору Саюзнай дзяржавы. Галоўнае, што такая работа пераводзіць інтэграцыю з палітычнай дэкларацыі ў канкрэтныя механізмы, зразумелыя бізнесу, заказчыку і пастаўшчыкам дзвюх краін», — рэзюмаваў Аляксей Шапашнікаў.
Фота Віталя Піваварчыка
