Пастаўкі тэхнікі, супрацоўніцтва ў АПК. Беларусь і Прыморскі край намецілі напрамкі супрацоўніцтва
1 чэрвеня, Мінск . Беларусь і Прыморскі край намецілі напрамкі далейшага супрацоўніцтва. Аб гэтым ішла размова на сустрэчы намесніка прэм’ер-міністра Беларусі Юрыя Шулейкі з губернатарам Прыморскага края Расіі Алегам Кажамякам,
На парадку дня — ключавыя аспекты гандлёва-эканамічнага супрацоўніцтва, дынаміка ўзаемнага тавараабароту і перспектывы далейшага ўзаемадзеяння.
Юрый Шулейка адзначыў дынамічнае развіццё двухбаковых адносін Беларусі і Прыморскага края. Пастаўлены пэўныя мэты і задачы для развіцця гандлёва-эканамічнага ўзаемадзеяння. Ён дадаў, што вельмі паспяховыя рэзультаты былі дасягнуты ў 2024 годзе. «Цяпер зноў нарастае гандлёва-эканамічнае ўзаемадзеянне. Мы маем узаемны інтарэс і ўзаемаразуменне. Прыморскі край паказвае прыклад таго, як можна сябраваць з Беларуссю, што можна знайсці карыснага. Вы нам таксама дапамагаеце шмат у чым», — сказаў ён.
У ліку перспектыўных напрамкаў узаемадзеяння з Прыморскім краем віцэ-прэм’ер назваў машынабудаванне, пастаўкі сельскагаспадарчай, камунальнай тэхнікі, аўтобусаў. Ёсць інтарэс да беларускай кар’ернай, дарожна-будаўнічай тэхнікі, ліфтавага абсталявання. Асаблівая ўвага ўдзяляецца гуманітарнай і культурнай сферам, медыцыне, адукацыі. Узорна-паказальным Юрый Шулейка назваў супрацоўніцтва ў сферы сельскай гаспадаркі. У планах — пашырэнне ўзаемадзеяння ў аграпрамысловай сферы і нарошчванне ўзаемных паставак харчовых тавараў і сельскагаспадарчай сыравіны.
«Сёння ёсць выбудаваная, дакладная сістэма ўзаемаадносін нашых эканомік», — дадаў Юрый Шулейка.
Алег Кажамяка падкрэсліў, што ў планах — пашырэнне тавараабароту з Беларуссю, культурнага, спартыўнага ўзаемадзеяння. Паводле яго слоў, беларуская прадукцыя папулярная і запатрабаваная ў Прыморскім краі. «Тавараабарот за першы квартал значна вырас як у імпарце, так і ў экспарце», — абазначыў ён.
Дэлегацыя Прыморскага края заўтра наведае выстаўку «Белагра» і азнаёміцца з беларускай сельгастэхнікай і прадукцыяй АПК. Праграмай візіту таксама прадугледжана сустрэча ў Беларускім дзяржаўным тэхналагічным універсітэце са студэнтамі з Прыморскага края і правядзенне чарговага пасяджэння рабочай групы па супрацоўніцтве Беларусі і Прыморскага края. 
Фота Віталя Піваварчыка
