СК: выяўлены факты вярбоўкі беларусаў для ўчынення тэрактаў на аб’ектах інфраструктуры
Фота з архіва 24 верасня, Мінск . Невядомыя схіляюць грамадзян да ўчынення актаў тэрарызму на аб’ектах інфраструктуры. Аб гэтым БЕЛТА паведамілі ў Следчым камітэце (СК).
Як расказалі ў ведамстве, праваахоўныя органы Беларусі фіксуюць выпадкі, калі да грамадзян нашай краіны ў месенджарах звяртаюцца невядомыя і пад розным выглядам схіляюць да ўчынення асабліва цяжкіх злачынстваў. У прыватнасці, паступаюць прапановы аб учыненні актаў тэрарызму на чыгунцы і іншых аб’ектах інфраструктуры за грашовую ўзнагароду.
Куратары шукаюць выканаўцаў у чатах месенджараў і сацсетках рознай накіраванасці. З самага пачатку яны ўступаюць у дыялог, фарміруюць даверныя адносіны, знаходзяць слабыя месцы, праз якія можна аказаць псіхалагічнае ўздзеянне на чалавека, а пасля прапануюць рэалізацыю злачыннага намеру. Адным з прыкладаў стала спроба зрабіць выканаўцам тэракта 18-гадовага хлопца. У месенджары Telegram з ім звязаўся невядомы, які прапанаваў «лёгкі падзаработак», які заключаўся ў падпале рэлейных шаф. Зламыснікі не ўтойваюць, што мэтай такой акцыі на тэрыторыі Беларусі з’яўляецца парушэнне міжнароднай лагістыкі з Расіяй, а таксама стварэнне ўмоў для катастрофы на чыгунцы. Малады чалавек адразу ж паведаміў аб гэтым у праваахоўныя органы.
СК мае ў распараджэнні і звесткі аб іншых неаднаразовых спробах вярбоўкі беларусаў. У ведамстве нагадалі, што такія дзеянні кваліфікуюцца па арт.289 (Акт тэрарызму) Крымінальнага кодэкса, а санкцыя артыкула прадугледжвае выключную меру пакарання.
Праваахоўныя органы пастаянна праводзяць комплекс следчых дзеянняў і аператыўных мерапрыемстваў па выяўленні дэструктыўнай і тэрарыстычнай дзейнасці на тэрыторыі нашай краіны. «Любыя радыкальныя ячэйкі будуць устаноўлены яшчэ на стадыі фарміравання, а тэрарыстычная дзейнасць спынена на стадыі падрыхтоўкі. Таксама нагадваем, што пры спыненні ўчынення асабліва цяжкіх злачынстваў, супрацоўнікі сілавых ведамстваў могуць прымяняць фізічную сілу, спецыяльныя сродкі і агнястрэльную зброю», — адзначылі ў СК.
