МЗС Беларусі рэкамендавала грамадзянам устрымацца ад паездак у шэраг краін Еўропы
Фота з архіва 25 кастрычніка, Мінск . У Міністэрстве замежных спраў Беларусі адзначаюць ускладненне абстаноўкі ў сферы бяспекі ў шэрагу дзяржаў Еўропы, у сувязі з чым ведамства распаўсюдзіла рэкамендацыі для грамадзян. Аб гэтым БЕЛТА паведамілі ў прэс-службе МЗС.
«Паводле інфармацыі, якая паступае, у шэрагу дзяржаў Еўропы, уключаючы асобныя дзяржавы — члены Еўрапейскага саюза, адзначаецца рэзкае ўскладненне ўнутрыпалітычнай абстаноўкі, што суправаджаецца масавымі акцыямі, у тым ліку з удзелам радыкальна настроеных асоб, паведамленнямі аб непрапарцыянальным прымяненні сілы з боку праваахоўных органаў і адвольных затрыманнях», — адзначылі ў МЗС.
У сувязі з гэтым Міністэрства замежных спраў настойліва рэкамендуе грамадзянам Беларусі ўстрымлівацца ад неабавязковых паездак у Францыю, Бельгію, Італію, Іспанію, Партугалію і Албанію, а пры адсутнасці вострай неабходнасці — перанесці або адмяніць такія паездкі.
Беларускае знешнепалітычнае ведамства звярнула ўвагу, што ў асобных рэгіёнах Францыі ўжо ўведзена каменданцкая гадзіна. «Не выключана яе распаўсюджванне на ўсю тэрыторыю краіны, увядзенне рэжыму надзвычайнага становішча, а таксама аналагічных абмежавальных мер у іншых закранутых беспарадкамі дзяржавах, уключаючы абмежаванне работы грамадскага транспарту і перабоі ў рабоце інтэрнэту і сродкаў сувязі», — лічаць у МЗС.
Грамадзянам Беларусі, якія знаходзяцца на тэрыторыі названых дзяржаў, рэкамендуецца захоўваць павышаныя меры асцярожнасці, пазбягаць месцаў масавага збору людзей і раёнаў правядзення пратэсных акцый, сачыць за паведамленнямі мясцовых улад і беларускіх загранустаноў.
Пры далейшым абвастрэнні абстаноўкі рэкамендуецца пакінуць тэрыторыі названых дзяржаў даступнымі камерцыйнымі маршрутамі.
«Звяртаем таксама ўвагу на магчымыя абмежаванні даступнасці консульска-прававой дапамогі ў сувязі з малой колькасцю дыпламатычнага складу беларускіх загранустаноў у названых краінах. Рэкамендуем загадзя захаваць экстранныя кантакты гэтых загранустаноў», — дадалі ў ведамстве.
