Фіналісты конкурсу «Сям’я года» ўшанавалі памяць герояў Вялікай Айчыннай вайны ў Мінску
7 кастрычніка, Мінск . Сем шматдзетных сем’яў з усёй Беларусі сабраліся ў Мінску для ўдзелу ў фінале конкурсу «Сям’я года». Значнай падзеяй першага дня стала ўскладанне кветак да стэлы «Мінск — горад-герой»,
Міністр працы і сацыяльнай абароны Андрэй Лабовіч адзначыў: «Мы ўсклалі кветкі да стэлы «Мінск — горад-герой», разумеючы важнасць сувязі малодшага і старэйшага пакаленняў і ўшаноўваючы тую памяць аб гераічным подзвігу савецкага народа, дзякуючы якому сёння мы жывём пад мірным небам. Гэта важны складнік выхавання нашага малодшага пакалення».
Сям’я Лях прыехала ў сталіцу з Дзятлаўскага раёна Гродзенскай вобласці. Муж і жонка Андрэй і Вольга выхоўваюць чацвярых дзяцей: трох дачок і сына. «Для нас удзел ва ўскладанні знакавы, таму што памяць аб падзеях Вялікай Айчыннай вайны, аб нашых родных і блізкіх, якія ўжо пайшлі з жыцця, — гэта і ёсць перадача сямейных традыцый, — расказаў галава сям’і Андрэй Лях. — Расказваючы нашым дзецям аб тым, якімі выдатнымі людзьмі былі іх бабулі і дзядулі, мы закладваем сямейныя каштоўнасці, гордасць за сваю сям’ю і краіну». Каменціруючы мэту ўдзелу ў конкурсе, Андрэй Лях адзначыў: «Мы хочам паказаць, што вялікая сям’я — гэта здорава, таму што яна напоўнена цеплынёй і любоўю».
Паводле слоў міністра працы і сацыяльнай абароны, чатыры дні фіналісты конкурсу правядуць у Мінску. Сёння для сем’яў падрыхтавалі насычаную культурную праграму — наведванне дэльфінарыя і заапарка, а ў наступныя два дні сем’і акунуцца ў падрыхтоўку да фіналу шоу-конкурсу, які пройдзе ўжо ў гэтую суботу, 10 кастрычніка. «У гэтым годзе фінал пройдзе ў абсалютна новым фармаце тэлевізійнага шоу, у час якога сем’і павінны будуць паказаць сябе ў розных выпрабаваннях, расказаць аб тых сацыяльных праектах, якімі яны займаюцца ў сябе ў рэгіёне», — расказаў Андрэй Лабовіч.
Таксама ён падкрэсліў, што сямейная палітыка заўсёды была ў аснове сацыяльнай палітыкі Беларусі. «Сям’я — гэта аснова дзяржавы. А шматдзетная сям’я — прыярытэт нашай сацыяльнай палітыкі ў краіне. І гэтым конкурсам мы хацелі падкрэсліць тую ўвагу, якую ўдзяляе кіраўнік дзяржавы падтрымцы шматдзетных сем’яў», — адзначыў міністр працы і сацыяльнай абароны. 
Фота Таццяны Матусевіч
