Ігар Брылевіч выбраны намеснікам старшыні Савета Рэспублікі
11 мая, Мінск . Ігар Брылевіч выбраны намеснікам старшыні Савета Рэспублікі. Такое рашэнне прынята ў выніку тайнага галасавання на пасяджэнні чацвёртай сесіі Савета Рэспублікі Нацыянальнага сходу восьмага склікання,
Намеснік старшыні Савета Рэспублікі выбіраецца тайным галасаваннем большасцю галасоў ад поўнага складу Савета Рэспублікі.
Кандыдатуру Ігара Брылевіча на пасаду намесніка старшыні Савета Рэспублікі вылучыў старшыня Пастаяннай камісіі Савета Рэспублікі па заканадаўстве і дзяржаўным будаўніцтве Міхаіл Русы. Пасля выбрання Ігар Брылевіч падзякаваў за аказаны яму высокі давер. Запэўніў, што прыкладзе ўсе намаганні для таго, каб дастойна выконваць ускладзеныя на яго абавязкі. 
Да гэтага часу Ігар Брылевіч працуе намеснікам старшыні Пастаяннай камісіі Савета Рэспублікі па заканадаўстве і дзяржаўным будаўніцтве, старшынёй Брэсцкага абласнога Савета дэпутатаў.
Практычна ўся яго кар’ера да выбрання на пасаду старшыні Брэсцкага абласнога Савета дэпутатаў была звязана з родным Пінскім раёнам. Пачынаў працаваць на прадпрыемстве «Завод Камертон» (горад Пінск), пасля чаго практычна 20 гадоў працаваў на розных пасадах у Пінскім раённым выканаўчым камітэце. Прайшоў шлях ад вядучага спецыяліста да намесніка старшыні Пінскага райвыканкама па эканоміцы і фінансах. Узначальваў сельскагаспадарчае прадпрыемства, затым — Пінскі райвыканкам.
«Тыя гады супалі з рэалізацыяй першай праграмы развіцця Прыпяцкага Палесся, якая дала вельмі сур’ёзны штуршок, імпульс развіццю Піншчыны. Станоўчы вопыт гэтай работы паслужыў падставай для таго, каб наш Прэзідэнт Аляксандр Лукашэнка прыняў рашэнне аб прыняцці другой праграмы Прыпяцкага Палесся, якая сёння паспяхова рэалізуецца ў нас на тэрыторыі», — сказаў Ігар Брылевіч.
Ён адзначыў, што з моманту выбрання на пасаду старшыні Брэсцкага абласнога Савета дэпутатаў асноўным прыярытэтам сваёй работы бачыў і бачыць, безумоўна, моцныя рэгіёны, на чым грунтуецца дзяржаўная палітыка. «Ад таго, наколькі рэгіёны развіваюцца, ствараюцца камфортныя ўмовы для жыцця нашых людзей, залежыць эканамічная бяспека нашай краіны», — сказаў ён.
Уладзіслаў Татарыновіч, які раней займаў пасаду намесніка старшыні Савета Рэспублікі, быў вызвалены ад пасады ў сувязі з назначэннем міністрам фінансаў Беларусі.
Фота Мікалая Пятрова
