Душэўны, матывуючы, карысны. Кантэнт любімых беларускіх блогераў цяпер на VIDEOBEL
12 кастрычніка, Мінск . Кантэнт папулярных беларускіх відэаблогераў цяпер можна глядзець не толькі ў сацыяльных сетках і месенджарах, але і на мультымедыйным партале VIDEOBEL.BY — БЕЛТА запускае новы ўнікальны праект. Пляцоўка прадастаўляе блогерам магчымасць размяшчаць свае эксклюзіўныя ролікі на нацыянальнай відэаплатформе.
«Гэта апраўданы і зразумелы крок у развіцці платформы. Не сакрэт, што блогасфера сёння актыўна развіваецца і самыя вядомыя блогеры недзе нават канкурыруюць з традыцыйнымі медыя, фарміруюць інфармацыйны парадак дня, ствараюць нагоды, чым і цікавы аўдыторыі, — адзначыў генеральны дырэктар БЕЛТА Андрэй Мохар. — Мы разумеем, што ёсць запыт на такі кантэнт, і таму даём магчымасць карыстальнікам VIDEOBEL.BY атрымліваць яго ў прывычным асяроддзі. З другога боку, у нашых айчынных блогераў з’яўляецца новая пляцоўка з новай аўдыторыяй. Значыць, гэты інтарэс узаемны».
Каманда БЕЛТА, прааналізаваўшы запыт аўдыторыі ў сацсетках, выбрала для пачатку сем аўтараў, блогі якіх прысвечаны розным тэмам — ад садовых спраў да будаўніцтва дома і выхавання дзяцей, ёсць і матывуючыя гісторыі аб пераадоленні і сіле духу, а таксама аб гуманнасці і клопаце пра жывёл. Сярод тых, хто будзе размяшчацца на VIDEOBEL.BY, ёсць блогеры са значнай аўдыторыяй — больш за 400 тыс. падпісчыкаў, а ў самага папулярнага — звыш 700 тыс. Андрэй Бабінскі пакажа будні паралімпійскага спартсмена, Настасся Чарняўская раскажа гісторыі выратаваных жывёл, Аляксандра Барысенка дасць парады маладым маці, Ксенія Вяцкая выбера лепшыя прадукты і падзеліцца арыгінальнымі рэцэптамі, Вольга Барташ навучыць рабіць упрыгажэнні сваімі рукамі, а садовы энтузіяст Кірыл Кветка раскрые сакрэты, як ператварыць звычайны агарод у квітнеючы сад. Глядач зможа выбраць кантэнт, які прыйдзецца яму даспадобы.
Як адзначыў Андрэй Мохар, фармат — не рэпост ролікаў, якія ўжо размешчаны на іншых платформах, гледачы VIDEOBEL.BY атрымаюць аўтарскія матэрыялы эксклюзіўнага зместу. «Мы паспрабуем сфарміраваць арыгінальную інфармацыйную экасістэму і прыцягнуць на айчынную медыяплатформу дадатковую аўдыторыю. У нас блогеры і СМІ не будуць канкурыраваць, а хутчэй арганічна суіснаваць. Што глядзець — заўсёды выбар гледача», — рэзюмаваў генеральны дырэктар БЕЛТА.
Праект VIDEOBEL.BY быў запушчаны 12 верасня 2024 года. Гэта мультымедыйны партал, дзе прадстаўлены відэакантэнт беларускіх СМІ: БЕЛТА, тэлеканалаў, холдынга «СБ. Беларусь сегодня» і рэгіянальных медыя. Наведвальнікі могуць выбраць матэрыял, які спадабаўся, і глядзець яго ў прамым эфіры або скарыстацца зручным адкладзеным праглядам. З 1 студзеня 2026 года на сайт зайшлі больш за 3 млн карыстальнікаў са 161 краіны, зафіксаваны дзясяткі мільёнаў праглядаў.
