М’янма зацікаўлена ў супрацоўніцтве з Беларуссю па шырокім коле пытанняў — Вальфовіч
17 верасня, Мінск . М’янма зацікаўлена ў супрацоўніцтве з Беларуссю па шырокім коле пытанняў, паведаміў журналістам дзяржаўны сакратар Савета бяспекі Аляксандр Вальфовіч па выніках сустрэчы з саветнікам па нацыянальнай бяспецы і міністрам у Канцылярыі Прэзідэнта Рэспублікі Саюз М’янма Цін Аун Санам,
Візіт Цін Аун Сана ў Беларусь праходзіць упершыню. Аляксандр Вальфовіч паведаміў, што літаральна тры месяцы таму сустракаўся з ім у Маскве на міжнароднай канферэнцыі, у час якой запрасіў наведаць нашу краіну. Рабочы візіт госця праходзіць пасля афіцыйнага візіту ў Беларусь Прэзідэнта М’янмы Мін Аун Хлайна, які адбыўся ў жніўні.
На сустрэчы абмяркоўвалася ў тым ліку рэалізацыя дасягнутых раней дамоўленасцей у розных сферах: эканоміцы, сельскай гаспадарцы — гэты напрамак вельмі цікавіў м’янманскі бок. У цэнтры ўвагі былі таксама пытанні ў сферы бяспекі.
«Адбыўся даволі шырокі абмен думкамі па поглядах на міжнародную абстаноўку, фарміраванне шматпалярнага свету, на тыя выклікі, рызыкі, пагрозы, якія зведваюць у большай ступені малыя дзяржавы ў адносінах да сябе, на сучасныя пагрозы, перш за ўсё кіберпагрозы, пагрозы, звязаныя з наркагандлем, гандлем людзьмі — сёння гэта праблема для Рэспублікі М’янма», — сказаў Аляксандр Вальфовіч.
Дзяржсакратар Савета бяспекі праінфармаваў, што для напаўнення парадку дня сустрэчы беларускім бокам быў распрацаваны і перададзены м’янманскаму боку праект мемарандума аб супрацоўніцтве — ён успрыняты з цікавасцю.
«Папрасілі паўзу для вывучэння, разгляду гэтых палажэнняў і ў далейшым пагадзіліся, што такі дакумент патрэбны. Рамачны дакумент, які будзе садзейнічаць больш планавай рабоце нашых апаратаў, паколькі яны таксама каардынуюць пытанні сілавога блока», — адзначыў Аляксандр Вальфовіч.
Паводле яго слоў, у М’янмы ёсць зацікаўленасць у развіцці супрацоўніцтва ў адукацыйнай сферы. Сёння некалькі студэнтаў з гэтай краіны вучацца ў грамадзянскіх ВНУ Беларусі. Па лініі Міністэрства абароны дасягнута дамоўленасць аб тым, што ў бліжэйшы час 16 ваеннаслужачых Узброеных Сіл М’янмы прыбудуць у Беларусь для абучэння ў Ваеннай акадэміі. М’янманскі бок звярнуўся з просьбай аказаць ім падтрымку на першапачатковым этапе.
«Я іх запэўніў у тым, што ўсіх, хто прыязджае ў Беларусь з добрымі намерамі, чакаюць выключна добразычлівыя адносіны», — падкрэсліў ён.
М’янма зацікавілася распрацоўкай беларускай пажарнай тэхнікі, а таксама пытаннямі ў сферы дзейнасці Дзяржаўнага ваенна-прамысловага камітэта.
«Адбылася вельмі добрая цёплая размова, сапраўды канструктыўная. Іх цікавіць усё: пытанні сельскай гаспадаркі і прамысловасці, нашы МАЗы. Нашы трактары яны хацелі б бачыць на сваіх палях. Папрасілі падтрымку з боку Дзяржаўнага сакратарыята Савета бяспекі ў рэалізацыі дамоўленасцей і падпісанні кантрактаў па гэтых тэмах», — акрэсліў Дзяржсакратар Савета бяспекі.
«Галоўны вынік нашай размовы — мы намецілі далейшыя шляхі ўзаемадзеяння, і гэта сапраўды будзе садзейнічаць больш цесным адносінам паміж нашымі краінамі», — рэзюмаваў Аляксандр Вальфовіч.
