Дабрачынны матч з удзелам зорак НХЛ і КХЛ упершыню прайшоў у Віцебску
11 ліпеня, Віцебск . У Віцебску ўпершыню адбыўся матч мясцовай хакейнай каманды і беларускіх спартсменаў, якія выступаюць за клубы КХЛ і НХЛ,
Абласны цэнтр прыняў яркі «Betera-тур зорак» і стаў першым у маршруце спартыўнага праекта. Таварыскі матч у Палацы спорту сабраў поўныя трыбуны, і адразу стала зразумела, што ў горадзе гэту гульню любяць і цэняць. Балельшчыкі бурна віталі спартсменаў ХК «Віцебск» і знакамітых хакеістаў з НХЛ і КХЛ.
Супраць віцебскай каманды выйшла зборная «Betera Stars», у якую ўключылі ў тым ліку і шэсць хакеістаў, якія пачыналі свой прафесійны шлях у абласным цэнтры. Гэта Ілья і Аляксей Протас (іх віцябчане віталі асабліва цёпла і гучна), Уладзіслаў Яроменка, Сяргей Сапега, Ягор Сідараў і Іван Драздоў.
Першую шайбу ў вароты праціўніка закінулі зоркі. У другім перыядзе віцябчане зраўнавалі лік. Да трэцяга перыяду спартсмены не ўступалі адзін аднаму, і толькі ў трэцім госці перайшлі ў актыўнае наступленне. У выніку лік склаў 5:2 на карысць каманды зорак.
Усе даходы ад продажу білетаў на матч будуць перададзены ў сацыяльныя дзіцячыя ўстановы. Арганізатары пасля завяршэння гульні падарылі хакеістам сертыфікат на 30 тыс. рублёў, і спартсмены вырашылі таксама накіраваць іх на дабрачыннасць.
Былы выхаванец СДЮШАР ХК «Віцебск» Сяргей Сапега, які выступае ў складзе расійскага хакейнага клуба СКА з Санкт-Пецярбурга, падзяліўся з журналістамі эмоцыямі пасля таварыскай сустрэчы на роднай для яго лядовай арэне. «Здорава, што правялі такі дабрачынны матч, столькі эмоцый перад пачаткам сезона. Спадзяюся, такія мерапрыемствы будуць праходзіць не толькі ў Віцебску. Я ў дзяцінстве шмат трэніраваўся тут разам з братам, і адразу з’явілася шмат цёплых успамінаў, калі вярнуўся сюды і выйшаў на лёд», — сказаў ён і пажадаў хлопчыкам і дзяўчынкам, якія пачынаюць свой шлях у спорце запасціся цярпеннем, захоўваць дысцыпліну, заўсёды прыслухоўвацца да трэнера і па поўнай выкладвацца на трэніроўках.
Мікіта Ядроец з ХК «Віцебск» адзначыў, што матч стаў добрым этапам у падрыхтоўцы каманды да маючага адбыцца сезона. «Прыемна было пагуляць з такімі моцнымі сапернікамі, яны недзе хутчэйшыя, і нам цяпер у гэтым плане таксама варта прыбавіць», — прызнаўся ён.
Трэнерам зорнай каманды выступіў член Савета Рэспублікі Дзмітрый Баскаў. Пасля матчу ён расказаў журналістам, што Віцебск невыпадкова быў выбраны для такой сустрэчы. «Атрымаўся прыгожы хакей, эмацыянальны. Гэта важна не толькі для клубаў экстралігі, але і для ўсіх аматараў хакея, для хлопцаў, якія сёння атрымалі магчымасць удзельнічаць у майстар-класе ігракоў НХЛ і КХЛ. Я ў сваім дзяцінстве мог пра такое толькі марыць. Гэта цяпер стане добрай традыцыяй. Хлопцы будуць збірацца летам, выязджаць на свой першы лёд, дзякаваць сваім настаўнікам і радаваць балельшчыкаў, — сказаў ён. — Гэта першы матч, мы зробім высновы, работу над памылкамі, і, думаю, наступныя будуць больш рэзультатыўнымі па ліку і колькасці прыгожых галоў. Сённяшні матч невыпадкова прайшоў у Віцебску — у зорнай камандзе шэсць выхаванцаў віцебскага хакея. Гэта вялікая заслуга дзіцячых трэнераў, якія тут працуюць, прысвяцілі гэтаму ўсё жыццё. Ім вялікі дзякуй за тое, што яны робяць. Наступны матч пройдзе ў нейкім з гарадоў, дзе (калі ў моманце будзем збіраць каманду) будзе таксама найбольшая колькасць прадстаўнікоў».
Дзмітрый Баскаў падкрэсліў, што палітыка, якую шмат гадоў таму выбраў кіраўнік дзяржавы па падтрымцы таленавітай моладзі, перспектыўных спартсменаў, цяпер дае пакаленне беларускіх зорак, якія выраслі ў пабудаваных пад патранажам Прэзідэнта палацах спорту і абараняюць гонар краіны на міжнародным узроўні.
