Фоталетапіс «Славянскага базару» з праектам «35 імгненняў фестывалю» прадставілі ў Гомелі
13 чэрвеня, Гомель . Унікальны сумесны праект дырэкцыі фестывалю і Беларускага тэлеграфнага агенцтва «35 імгненняў фестывалю», прысвечаны юбілею Міжнароднага фестывалю мастацтваў «Славянскі базар у Віцебску», упершыню прадставілі ў час «Васільковага туру» ў Гомелі,
Гэта фотавыстава — гісторыя фестывалю ў кадрах, на якіх удалося адлюстраваць эмоцыі ўдзельнікаў і гасцей, зорак эстрады, імгненні, якія ўвайшлі ў гісторыю «Славянскага базару». Пры падрыхтоўцы выставы былі перагледжаны многія тысячы лічбавых і алічбаваных кадраў: за тры з палавінай дзесяцігоддзі архіў БЕЛТА сабраў тэрабайты фотагісторыі легендарнай «Славянкі».
Гісторыя фестывалю адлюстравана на 34 плакатах — летапіс кожнага года «Славянскага базару». На кожным з іх сабраны яркія моманты і выступленні ад самага першага творчага фэсту ў 1992 годзе да 34-га, які адбыўся мінулым летам. Усяго больш за 120 фатаграфій — ад чорна-белых да каляровых. Большасць фатаграфій зроблены вядучым фотакарэспандэнтам БЕЛТА Аляксандрам Хітровым: самыя першыя — яшчэ на плёнку, на сучасным этапе — на лічбавую камеру.
У кадры не толькі выступленні, але і жыццё на вуліцах фестывальнага Віцебска — выставы, творчыя праекты, шэсце маладзёжных субкультур і эмоцыі. «Віцебск асабліва расцвітае і раскрываецца ў гэтыя перыяды. І кожны кадр гэта паказвае», — расказалі арганізатары выставы.
У гэтым годзе часцінка аднаго з самых душэўных міжнародных фестываляў мастацтваў, уключаючы фотавыставу, прыбудзе ў кожны рэгіён. «Славянскі базар» адправіўся ў гастрольны тур па Беларусі. Першым у маршруце стаў Гомель, затым «Славянка» прадоўжыць свой шлях па абласных цэнтрах.
Фота Марыны Васільевай
