Чаго дасягнула беларуская энергетыка за 25 гадоў, расказаў міністр
Фота з архіва 2 верасня, Мінск . Чаго дасягнула беларуская энергетыка за 25 гадоў, расказаў журналістам міністр энергетыкі Дзяніс Мароз на прэс-мерапрыемстве да 25-годдзя Мінэнерга,
Як адзначыў міністр, стварэнне Міністэрства энергетыкі ў пачатку 2000-х гадоў было прадыктавана неабходнасцю вызначэння дзяржаўнай палітыкі па развіцці энергетычнага сектара ў Беларусі. «Энергетыка ў нашай краіне, як і ў любой іншай, — гэта сэрвісны напрамак, што рэалізуе тыя задачы, якія стаяць на цяперашні момант перад прамысловасцю. У пачатку 2000-х гадоў у нашай краіне пачалося бурнае развіццё эканомікі, расло спажыванне энергетычных рэсурсаў, і, вядома, трэба было адказваць на пытанне, як будзе развівацца энергетыка. За 25 гадоў у Міністэрстве энергетыкі рэалізавана даволі вялікая колькасць дзяржаўных праграм, якія дазволілі вырашыць шэраг фундаментальных праблем, з якімі сутыкалася наша краіна ў канцы 1990-х — пачатку 2000-х гадоў. Напрыклад, мы былі імпарцёрамі электрычнай энергіі. У 2001 годзе аб’ём імпарту электрычнай энергіі складаў каля 8 млрд кВт.гадз. А ў 2019 годзе наша краіна ператварылася ў чыстага экспарцёра электрычнай энергіі, і мы на знешні рынак прадалі больш за 2 млрд кВт.гадз. Мы стварылі энергетычныя магутнасці, якія выраблялі неабходны аб’ём электраэнергіі для ўсё большай патрэбнасці як унутры краіны, так і за мяжой», — расказаў ён.
Значная ўвага ўдзялялася развіццю электрасеткавай інфраструктуры — будаўніцтву электрычных сетак і мадэрнізацыі. «Гэта прыводзіла да значнага зніжэння страт электрычнай энергіі ў размеркавальнай сетцы. Вялікую ўвагу мы ўдзялялі рэканструкцыі і мадэрнізацыі цеплавых сетак за кошт будаўніцтва сетак з ПІ-труб, дзякуючы чаму дабіліся значнага скарачэння страт цеплавой энергіі — з узроўню каля 10% у пачатку 2000-х да менш як 7% па выніках 2025 года», — прывёў лічбы Дзяніс Мароз.
Акрамя таго, рэалізавана некалькі дзяржаўных праграм па газіфікацыі ў сельскай мясцовасці. Забяспечана газам 85% кватэр у Беларусі. Гэта адзін з самых высокіх паказчыкаў на постсавецкай прасторы. Таксама за кошт рэалізацыі дзяржаўных праграм развівалася тарфяная прамысловасць, сфарміраваны фундамент для выкарыстання нацыянальнага рэсурсу як для паліва, так і для няпаліўных напрамкаў. 
Фота Яраслава Зарэцкага
