Беларускія старшакласнікі паўдзельнічаюць у фінале алімпіяды Саюзнай дзяржавы ў Саранску
Фота з архіва 19 кастрычніка, Мінск . Вучні Беларусі пакажуць свае веды на заключным этапе алімпіяды Саюзнай дзяржавы ў Саранску. Аб гэтым БЕЛТА паведамілі ў Міністэрстве адукацыі.
Сёння стартуе заключны этап алімпіяды Саюзнай дзяржавы «Расія і Беларусь: гістарычная і духоўная супольнасць». У інтэлектуальных і творчых спаборніцтвах прымуць удзел 137 старшакласнікаў (навучэнцаў 10-11-х класаў) з Беларусі і Расіі. Нашу краіну прадставяць 48 пераможцаў адборачнага этапу з усіх абласцей, Мінска, а таксама Ліцэя імя Ф.Э.Дзяржынскага БДУ.
У праграме алімпіяды два абавязковыя туры: комплексная работа па рускай мове і літаратуры і напісанне сачынення, а таксама конкурс рытарычнага майстэрства. Ацэніць веды і таленты алімпіяднікаў аўтарытэтнае журы, у складзе якога — вядучыя вучоныя і педагогі дзвюх краін.
Удзельнікаў чакае і насычаная культурная праграма. Яны пазнаёмяцца з гістарычным мінулым і традыцыямі Мардовіі, прымуць удзел у вечарах дружбы. У дзень адкрыцця адбудзецца грамадска-патрыятычная акцыя з ускладаннем кветак да Вечнага агню на Мемарыяле воінам Мардовіі, якія загінулі ў гады Вялікай Айчыннай вайны.
Арганізатары мерапрыемства — Міністэрства адукацыі Рэспублікі Беларусь і Міністэрства асветы Расійскай Федэрацыі.
Алімпіяда завершыцца 24 кастрычніка. У 2025 годзе заключны этап праходзіў у Беларусі — яго прыняў Віцебск.
