Беларускія парламентарыі станоўча ацэньваюць супрацоўніцтва з краінамі Лацінскай Амерыкі
Фота Палаты прадстаўнікоў Нацыянальнага сходу Рэспублікі Беларусь 21 кастрычніка, Мінск . У Палаце прадстаўнікоў прадаўжаецца практыка правядзення семінараў па актуальных пытаннях сусветнай палітыкі. Тэма сённяшняга — «Беларусь і Лацінская Амерыка: прыярытэты доўгатэрміновага партнёрства»,
Старшыня Пастаяннай камісіі Палаты прадстаўнікоў па міжнародных справах Сяргей Рачкоў адзначыў, што Лацінская Амерыка — цікавы рэгіён, які прадстаўляе значныя магчымасці. «Але выкарыстоўваць гэтыя магчымасці даволі няпроста. Гэта не звязана толькі з адлегласцю паміж Беларуссю і рэгіёнам, але і перш за ўсё з тым, што многія краіны знаходзяцца або ў прамым сэнсе, або апасродкавана пад уплывам Злучаных Штатаў Амерыкі. Мы памятаем новую Стратэгію нацыянальнай бяспекі ЗША, яны ў цэлым вылучылі Заходняе паўшар’е як рэгіён іх асаблівых нацыянальных інтарэсаў. Тым не менш у Беларусі свая гісторыя адносін са многімі краінамі рэгіёна. У нас устойлівыя кантакты, і супрацоўнічаем мы не толькі ў палітычным плане, але і ў гандлёва-эканамічным. Дастаткова сказаць, што Беларусь мае свае пасольствы ў пяці краінах рэгіёна, у многіх краінах працуюць нашы ганаровыя консулы, якія аказваюць садзейнічанне ў развіцці перш за ўсё гандлёва-эканамічнага і гуманітарнага супрацоўніцтва», — расказаў ён. 
Парламентарый падкрэсліў, што вялікая ўвага звяртаецца на краіны Лацінскай Амерыкі, Карыбскага басейна.
Цесныя адносіны выбудаваны з парламентамі Кубы, Венесуэлы, Балівіі, Эквадора, Бразіліі. «Гэтыя краіны адыгрываюць асаблівую ролю ў міжнародных арганізацыях, у тым ліку ў міжнародных парламенцкіх структурах, перш за ўсё ў Міжпарламенцкім саюзе. На чарговай асамблеі МПС у Танзаніі мы бачылі, якая вага ў краін Лацінскай Амерыкі, якія нават вылучылі на пасаду старшыні МПС свайго прадстаўніка — сенатара Чылі. Таму вельмі важна, нягледзячы на аб’ектыўныя або суб’ектыўныя складанасці, ісці ў гэты рэгіён больш настойліва, дынамічна, больш шырокімі крокамі, што мы, у прынцыпе, і робім», — канстатаваў Сяргей Рачкоў.
У 2025 годзе рост тавараабароту паміж Беларуссю і краінамі рэгіёна вырас больш як у 1,4 раза, вырас і экспарт беларускіх тавараў — больш як на 40%. «У нас нядрэнныя паказчыкі, але неабходна прыбаўляць. І тут парламентарыі выконваюць сваю функцыю. Мы арыентуемся на работу ў складзе міжурадавых камісій па гандлёва-эканамічным супрацоўніцтве, уносім свае прапановы для абмеркаванняў, абмяркоўваем гэтыя ж тэмы са сваімі калегамі — парламентарыямі ў краінах Лацінскай Амерыкі. Мы стараемся выкарыстоўваць і міжнародныя пляцоўкі для абмеркавання не толькі палітычных пытанняў, хоць, хачу сказаць, што палітычная падтрымка гэтых краін для Беларусі таксама важная, але і гуманітарнага ўзаемадзеяння. Усё ж такі людзі фарміруюць адносіны паміж дзяржавамі. У нашым парламенце працуюць групы дружбы з парламентамі краін Лацінскай Амерыкі. Найбольш высокі статус у групы з Кубай — гэта міжпарламенцкая камісія, якую ўзначальваюць старшыні абедзвюх палат Нацыянальнага сходу. Мы вельмі актыўна ўзаемадзейнічаем з парламентам Венесуэлы, працуем з адносна новымі краінамі, я назаву сярод іх Калумбію. Таму сённяшні семінар з’яўляецца ў большай ступені вывучэннем магчымасцей у пашырэнні перш за ўсё гандлёва-эканамічных інтарэсаў Беларусі ў Лацінскай Амерыцы», — адзначыў парламентарый. 
Традыцыйна сярод прыярытэтаў супрацоўніцтва — сельская гаспадарка, прамысловасць, а таксама гуманітарны напрамак: ахова здароўя, медыцына і фармацэўтыка, якая з’яўляецца адным з лакаматываў у развіцці гандлёва-эканамічнага супрацоўніцтва Беларусі з краінамі Лацінскай Амерыкі. Таму парламентарыі рэгіёна прыязджаюць у Беларусь, знаёмяцца з яе магчымасцямі. Па выніках сустрэч заключаюцца ў тым ліку камерцыйныя кантракты.
У семінары прынялі ўдзел прадстаўнікі Міністэрства замежных спраў, Нацыянальнай акадэміі навук Беларусі, Беларускага таварыства дружбы і культурнай сувязі з замежнымі краінамі, Акадэміі кіравання пры Прэзідэнце Беларусі, БДУ і БДУЗМ.
Перад парламентарыямі пастаўлены задачы паглыбіць разуменне асаблівасцей лацінаамерыканскага рынку, дакладна ўяўляць, у якіх краінах і па якіх напрамках у Беларусі ёсць рэальныя магчымасці для больш устойлівай і доўгатэрміновай прысутнасці ў рэгіёне. Таксама будуць вызначаны напрамкі дзейнасці на бліжэйшую перспектыву. 
Таксама беларускім парламентарыям даручана больш актыўна ўдзельнічаць у двухбаковых міжурадавых камісіях, правесці пасяджэнне Міжпарламенцкай камісіі па супрацоўніцтве з Нацыянальнай асамблеяй народнай улады Кубы і выканаць дамоўленасці па выніках візіту старшыні Парлаціна — анлайн-дыялог профільных камісій дасць магчымасць своечасова аказваць падтрымку праектам беларускіх прадпрыемстваў, якія каардынуюцца Міністэрствам замежных спраў.
