Беларусь прапануе краінам СНД аб’яднаць намаганні для развіцця крэатыўных індустрый
Аляксандр Турчын 18 чэрвеня, Мінск . Беларусь прапануе краінам СНД аб’яднаць намаганні для развіцця крэатыўных індустрый. Аб гэтым заявіў прэм’ер-міністр Беларусі Аляксандр Турчын на пленарным пасяджэнні міжнароднай канферэнцыі па ўмацаванні культурных сувязей і развіцці крэатыўных і творчых індустрый «Узаемадзеянне культур: захаванне спадчыны і глабальны дыялог у сучасным свеце» ў Санкт-Пецярбургу,
«Праектам Асноўных напрамкаў рэалізацыі Дагавора аб стварэнні Саюзнай дзяржавы на 2027-2029 гады прадугледжаны тры ключавыя блокі. Першы — гэта збліжэнне падыходаў да класіфікацыі крэатыўных індустрый і ацэнкі іх укладу ў эканоміку. У пачатку 2026 года Беларусь зацвердзіла пералік зборных груповак крэатыўных індустрый. Расійская і беларуская методыкі ў цэлым падобныя і абапіраюцца на падыходы ЮНКТАД. Іх далейшая гарманізацыя павысіць эфектыўнасць дзяржаўнай палітыкі. Другі — абмен вопытам у галіне рэгулявання крэатыўнай эканомікі. Трэці — рэалізацыя сумесных культурных і турыстычных праектаў», — сказаў Аляксандр Турчын.
На прасторы СНД таксама рэалізуюцца значныя ініцыятывы, якія садзейнічаюць умацаванню культурных сувязей: пагадненне аб сумеснай фільмавытворчасці, наданне Нацыянальнаму гісторыка-культурнаму музею-запаведніку «Нясвіж» статусу базавай арганізацыі СНД па музейнай справе.
«Мы ўсе ў пачатку шляху па развіцці крэатыўнай эканомікі. Таму сумеснае абмеркаванне развіцця крэатыўных індустрый усімі краінамі СНД, пошук новых падыходаў маюць стратэгічнае значэнне для мадэрнізацыі эканомік і ўмацавання гуманітарных сувязей у рэгіёне. Краінам СНД для выгаднага супрацоўніцтва ў крэатыўнай індустрыі неабходна сфакусіравацца на стварэнні агульнага лічбавага рынку, сумеснай вытворчасці кантэнту і абароне інтэлектуальнай уласнасці. У выніку сумесных дзеянняў мы атрымліваем маштабаванне рынку, што азначае выхад лакальных праектаў на агульную аўдыторыю больш чым 250 млн чалавек, зніжэнне выдаткаў, а значыць, раздзяленне затрат на дарагую вытворчасць графікі, софту і кіно, пашырэнне ўнікальнага культурнага кода краін СНД на сусветным узроўні. Садружнасць можа выступаць эфектыўнай пляцоўкай для абмену лепшымі практыкамі крэатыўных індустрый», — падкрэсліў прэм’ер-міністр.
На яго думку, крэатыўная эканоміка — не проста новы сектар гаспадаркі, гэта змена мадэлі канкурэнтаздольнасці ў глабальным маштабе. «Беларусь, Расія і ўсе краіны Садружнасці валодаюць унікальным патэнцыялам: агульная гісторыя, культурныя традыцыі, высокі ўзровень адукацыі, тэхналагічныя кампетэнцыі і, што асабліва важна, палітычная воля да супрацоўніцтва. Упэўнены, што аб’яднанне намаганняў дасць нам магчымасць сфарміраваць канкурэнтаздольную крэатыўную галіну эканомікі, якая зможа стаць адным з галоўных драйвераў росту і ўстойлівага развіцця нашых краін», — рэзюмаваў кіраўнік беларускага ўрада. 
Фота Віталя Піваварчыка
