Багадзель: вопыт украінскага канфлікту патрабуе пераасэнсавання
Навіны сюжэта «Праект «У тэме» на YouTube-канале БЕЛТА » Эксперт расказаў, якія ўрокі Беларусь атрымлівае са СВА і канфлікту паміж ЗША і Іранам Багадзель: вучэнні НАТА каля граніц Беларусі аўтаматычна з’яўляюцца выклікам ваеннай бяспецы 27 жніўня, Мінск . Вопыт украінскага канфлікту нельга механічна пераносіць у баявыя статуты. Такое меркаванне ў праекце БЕЛТА «У тэме» выказаў кандыдат ваенных навук Андрэй Багадзель.
«Мы ўсе гаворым: вопыт СВА, вопыт Ірана, вопыт яшчэ нейкіх войнаў. А звярніце ўвагу: ні Расійская Федэрацыя, ні Рэспубліка Беларусь, ні Літва, ні Польшча, ні іншыя краіны, у тым ліку Злучаныя Штаты, не перапісалі свае баявыя і палявыя статуты пад гэтыя ўзброеныя канфлікты», — заўважыў ваенны эксперт.
У гэтым кантэксце Андрэй Багадзель згадаў нядаўнія паведамленні аб тым, што ЗША згортваюць і расфарміроўваюць эксперыментальны батальён ударных беспілотнікаў у Еўропе, створаны на базе 173-й паветрана-дэсантнай брыгады. Інакш кажучы, Злучаныя Штаты прыйшлі да высновы, што ім не падыходзіць украінскі вопыт.
«Прычым гэтыя высновы былі зроблены адразу пасля вучэння з украінцамі, дзе нам усім было паднесена, што нейкае ўкраінскае падраздзяленне, узброенае беспілотнікамі, поўнасцю там парэзала амерыканскія войскі. Але амерыканцы ж не дурні, яны ўсё добра разумеюць і ўсведамляюць. Прычым сказалі так, што «беспілотнік — гэта перш за ўсё штучны інтэлект. Беспілотніка мала — гэта сродак салдата, як аўтамат і граната. І ніякім чынам мы не павінны страціць таго байца, які здольны дзейнічаць менавіта як салдат у гэтых складаных умовах абстаноўкі». Таму той, хто сёння агульна прымяняе гэты вопыт і бярэ яго за аснову, напэўна, у наступнай вайне, хутчэй за ўсё, пацерпіць поўнае паражэнне. Адсюль таму і няма гэтай татальнай змены баявых статутаў», — растлумачыў эксперт.
Разам з тым ён пагадзіўся, што барацьба за малое паветра становіцца адной з ключавых задач падраздзяленняў, свае асаблівасці ўносіць і інфраструктурная вайна.
«Пытанні заваявання панавання ў паветры, заваявання агнявой перавагі, выкарыстання вялікіх злучэнняў — гэта цяпер тое новае, у што трэба ўбудаваць усе элементы, і паглядзець па-сапраўднаму: а дзе роля і месца артылерыі, дзе роля і месца авіяцыі, дзе роля і месца вялікіх танкавых злучэнняў, якія будуць убіваць свой клін у абарону праціўніка. Вось што сёння па-сапраўднаму нам трэба пераглядаць. Бо ніводная краіна — ні еўрапейская, ні амерыканцы — не адмовілася ад вытворчасці танкаў», — падкрэсліў Андрэй Багадзель.
Ён перакананы, што артылерыя, нягледзячы на актыўнае прымяненне беспілотных лятальных сродкаў, застаецца богам вайны. Тым больш артылерыйскі зарад значна больш магутны за дрон, начынены ўзрыўчаткай.
«Гавораць, сёння 10, 20, 30, 50, 100 беспілотнікаў на кіламетр фронту. Але ўсе чамусьці забылі, што ў свой час была такая велічыня, як 100-150 гармат на кіламетр фронту. Цяпер уявіце, што можа зрабіць артылерыя, якая шмат разоў можа прымяніць гэта ўсё: па сутнасці, зрабіць з усяго, што знаходзіцца насупраць вас, проста паверхню месяца. А дабавіць потым авіяцыю, якая пойдзе з ФАБамі і іншымі бомбамі, — той, хто выжыве, не будзе разумець наогул, дзе ён знаходзіцца і што адбываецца», — звярнуў увагу эксперт.
