Навабранцы брыгады спецназа ўнутраных войскаў прынялі ваенную прысягу
14 лістапада, Мінск . Больш за 250 навабранцаў вайсковай часці 3214 унутраных войскаў прынялі ваенную прысягу,
Радавы Антон Буян, які прыняў прысягу, прызнаўся, што крыху хваляваўся сёння. Але калі ўбачыў у натоўпе бацькоў, якія прыйшлі яго падтрымаць, і сказаў словы прысягі, яму стала лягчэй. «Ганаруся тым, што служу менавіта ў брыгадзе спецназа. Вучэбны збор па падрыхтоўцы новага папаўнення прайшоў выдатна. Камандзіры нас разумеюць, добра адносяцца да асабовага складу, дбаюць пра нас», — падкрэсліў хлопец.
Яго маці, Людміла Андрэеўна, таксама ганарыцца тым, што сын трапіў менавіта ў вайсковую часць 3214. «Ужо бачу, што ён падужэў, пасталеў. Жадаю яму і ўсім яго таварышам па службе і камандзірам здароўя, мірнай службы і ўсяго самага добрага», — сказала яна.
Намеснік міністра ўнутраных спраў — камандуючы ўнутранымі войскамі Мікалай Карпянкоў указаў, што кожнаму мужчыне, які служыў, дзень прыняцця прысягі ярка запамінаецца. «Менавіта пасля прыняцця ўрачыстай клятвы Радзіма ўручае яму зброю і ён становіцца абаронцам сваёй сям’і, сваёй зямлі, сваёй Айчыны. У іх вачах відаць, што яны гатовы выканаць любы загад, стаць на абарону сваёй краіны», — адзначыў Мікалай Карпянкоў.
Ён таксама адзначыў, што ўнутраныя войскі вельмі добра ўкамплектаваны. «Пасля праходжання тэрміновай ваеннай службы ва ўнутраных войсках засталося каля 60% хлопцаў, а ў брыгадзе спецыяльнага прызначэння — 90%. У новым папаўненні 65% хлопцаў з вышэйшай адукацыяй. Усяго сёння больш за 1,5 тыс. навабранцаў прымаюць прысягу ва ўнутраных войсках. Мы выхавалі нашу моладзь так, што яны разумеюць: Радзіму, калі спатрэбіцца, трэба абараняць са зброяй», — сказаў камандуючы ўнутранымі войскамі.
Пасля прысягі навабранцаў чакае адпускны білет, а затым яны вернуцца ў часць і прадоўжаць баявую падрыхтоўку. «Прэзідэнт і міністр унутраных спраў падкрэслівалі, што ні ў якім разе не павінна быць бессэнсоўнай муштры. Байцы будуць абучацца рукапашнаму бою, тактычнай, агнявой і фізічнай падрыхтоўцы. Унутраныя войскі — гэта войскі правапарадку, якія ў мірны час выконваюць баявыя задачы», — падкрэсліў Мікалай Карпянкоў.
Родных і блізкіх ваеннаслужачых таксама чакалі паказальныя выступленні, выстаўкі зброі, ваеннай і спецыяльнай тэхнікі, а повары прыгатавалі для гасцей салдацкую кашу і гарбату.
