Тавараабарот Беларусі і Кыргызстана за пяць гадоў вырас амаль у чатыры разы
Эрліст Акунбекаў 10 лістапада, Мінск . Аб’ём узаемнага тавараабароту паміж Беларуссю і Кыргызстанам павялічыўся амаль у чатыры разы за 2021-2025 гады. Аб гэтым заявіў намеснік старшыні Кабінета Міністраў Кыргызстана Эрліст Акунбекаў у час пленарнага пасяджэння І Форуму рэгіёнаў Беларусі і Кыргызстана,
«Кыргызскі бок разглядае міжрэгіянальнае супрацоўніцтва як важны напрамак у двухбаковым узаемадзеянні, патэнцыял якога яшчэ трэба будзе раскрыць у поўнай меры. Наша агульная задача — напоўніць яго канкрэтнымі праектамі, якія адпавядаюць прыярытэтам дарожнай карты па развіцці гандлёва-эканамічнага супрацоўніцтва да 2030 года. Развіццё рэгіянальных сувязей абапіраецца на дадатную дынаміку ўзаемнага гандлю. Гэтыя вынікі сведчаць аб усё большай зацікаўленасці прадпрыемстваў дзвюх краін у супрацоўніцтве. Дадатковыя магчымасці для сумеснай работы стварае развіццё эканомікі Кыргызстана», — сказаў Эрліст Акунбекаў.
Ён падкрэсліў, што форум прызначаны надаць міжрэгіянальным сувязям дадатковы імпульс і стаць пляцоўкай для дыялогу паміж рэгіянальнымі органамі ўлады, дзелавымі коламі і профільнымі арганізацыямі дзвюх краін. «Хацеў бы адзначыць асобную праграму, прадугледжаную для рэгіянальных дэлегацый. Яна дала магчымасць прадметна азнаёміцца з патэнцыялам партнёраў і абмеркаваць перспектывы сумеснай работы», — звярнуў увагу намеснік старшыні Кабінета Міністраў Кыргызстана.
Новыя прадпрыемствы ў Кыргызстане ствараюцца пераважна ў рэгіёнах, дадаў ён. Гэта садзейнічае развіццю мясцовай эканомікі і пашырае магчымасці для вытворчай кааперацыі з беларускімі партнёрамі. «Нацыянальная праграма развіцця Кыргызскай Рэспублікі да 2030 года прадугледжвае далейшае развіццё сельскай гаспадаркі і перапрацоўкі, транспартнай інфраструктуры, энергетыкі і турызму. Адначасова рэалізуецца дзяржаўная праграма комплекснага развіцця рэгіёнаў, якая ўлічвае асаблівасці і эканамічную спецыялізацыю кожнай тэрыторыі. Разлічваем на актыўны ўдзел беларускіх прадпрыемстваў у рэалізацыі праектаў па гэтых напрамках. Практычныя прыклады такога ўзаемадзеяння ўжо ёсць», — канстатаваў Эрліст Акунбекаў.
Адным з перспектыўных напрамкаў далейшай работы кыргызскі бок лічыць сельскую гаспадарку і перапрацоўку адпаведнай прадукцыі. «Абапіраючыся на вопыт вытворчай кааперацыі савецкага перыяду і адаптуючы да сучасных умоў, прапануем прапрацаваць стварэнне ў рэгіёнах Кыргызстана сумесных жывёлагадоўчых комплексаў і перапрацоўчых прадпрыемстваў з удзелам партнёраў з Беларусі. Такая мадэль дала б магчымасць выбудаваць поўны вытворчы цыкл ад развядзення і адкорму буйной рагатай жывёлы да перапрацоўкі, захоўвання і рэалізацыі гатовай прадукцыі. Нараўне з забеспячэннем унутранага рынку Кыргызстана сумесныя прадпрыемствы маглі б арыентавацца на экспарт у краіны Цэнтральнай Азіі, перш за ўсё ва Узбекістан і Таджыкістан. Гэта пашырыла б рынкі збыту і павысіла б эканамічную прывабнасць праектаў для абодвух бакоў», — агучыў прапановы намеснік старшыні Кабінета Міністраў Кыргызстана.
Арганізатарамі форуму выступаюць Нацыянальны цэнтр падтрымкі экспарту Беларусі і Міністэрства эканомікі і камерцыі Кыргызстана. Тэма пленарнага пасяджэння — «Рэгіянальнае ўзаемадзеянне — драйвер эканомікі Беларусі і Кыргызстана». У час форуму падпісаны шэраг двухбаковых дакументаў.
Фота Віталя Піваварчыка
