Сустрэчы, карціны і карты жаданняў: як VIDEOBEL.BY адзначыў дзень нараджэння
19 верасня, Мінск . Дзень нараджэння мультымедыйнага партала VIDEOBEL.BY прайшоў у атмасферы шчырых сустрэч і творчых адкрыццяў. Гасцей чакалі ў Музеі наіўнага мастацтва, дзе святочная праграма аб’яднала размовы аб журналістыцы, знаёмства з жывапісам і майстар-клас,
У гэты дзень музей стаў месцам сустрэчы прадстаўнікоў СМІ, журналістаў і блогераў. Госці размаўлялі, знаёміліся адзін з адным, разглядалі экспанаты і дзяліліся ўражаннямі. Жадаючыя маглі далучыцца да бясплатнай экскурсіі і даведацца больш аб наіўным мастацтве — напрамку, у якім мастакі перадаюць уласнае бачанне свету, не імкнучыся прытрымлівацца акадэмічных правіл.
Працягам праграмы сталі творчыя сустрэчы з тэлевядучымі Таццянай Рудакоўскай і Вікторыяй Сянкевіч. Размова ішла аб прафесіі, рабоце перад камерай, журналісцкай этыцы і вопыце розных пакаленняў. Удзельнікі маглі пачуць гісторыі з тэлевізійнай практыкі і абмеркаваць, як мяняецца журналістыка і што застаецца ў ёй нязменным. «Мы можам даць маладым журналістам мудрасць і вопыт, а яны вучаць нас дзёрзкасці», — адзначыла Таццяна Рудакоўская.
Асаблівы настрой сустрэчы надалі асабістыя гісторыі і ўражанні наведвальнікаў. Для адных музей аказаўся нечаканым адкрыццём, іншыя ўбачылі ў работах мастакоў шчырасць і асаблівую жыццёвую энергію. Госць з Расіі Мікалай, прызнаўся, што яго кранулі карціны, у якіх адчуваецца душэўнасць і непасрэднасць. Удзельніца Алена адзначыла, што такія сустрэчы дапамагаюць адкрываць для сябе культуру і нагадваюць пра важнасць захавання спадчыны.
Яшчэ адной часткай свята стаў майстар-клас па стварэнні карт жаданняў. Госці змаглі адысці ад паўсядзённых клопатаў, папрацаваць з уласнымі ідэямі і планамі, а таксама забраць з сабой вынік творчых заняткаў.
Выбар пляцоўкі арганізатары растлумачылі сімвалічным падабенствам: наіўнае мастацтва прапануе ўбачыць свет па-свойму, а VIDEOBEL.BY адкрывае новыя магчымасці для знаёмства з беларускім кантэнтам і ўзаемадзеяння. У выніку дзень нараджэння партала стаў не толькі нагодай падвесці вынікі, але і магчымасцю сустрэцца асабіста, абмяняцца ўражаннямі і правесці час у прыемнай культурнай прасторы.
Фота Таццяны Матусевіч
