Высокія вынікі без урону для здароўя. Каранік паставіў задачы для РНПЦ спорту
Уладзімір Каранік. Фота з архіва 26 красавіка, Мінск . Намеснік прэм’ер-міністра Уладзімір Каранік ацаніў укараненне інавацыйных медыцынскіх методык — ад аднаўлення атлетаў пасля траўмаў да павышэння іх трываласці — у Рэспубліканскім навукова-практычным цэнтры спорту і паставіў задачу аказання спартсменам максімальна комплекснай і якаснай меддапамогі,
Пытанне, якое стаіць на парадку дня, — як перадавыя медыцынскія тэхналогіі дапамагаюць спартсменам біць рэкорды? «На жаль, спорт высокіх дасягненняў не бывае без траўмаў. Ад таго, наколькі якасна будзе аказана дапамога, наколькі поўнааб’ёмна і прафесіянальна будзе праведзена рэабілітацыя, залежыць не толькі спартыўны лёс дзіцяці, падлетка або дарослага атлета, але і якасць іх жыцця ў далейшым, — падкрэсліў віцэ-прэм’ер. — Наша задача зрабіць так, каб спартсмены радавалі нас дасягненнямі без урону для свайго здароўя».
Уладзімір Каранік дадаў, што ў РНПЦ спорту гэту функцыю выконваюць. Спартсмены знаходзяцца пад дынамічным назіраннем, што дазваляе своечасова рэагаваць на змены ў іх фізічным стане і не толькі аказваць дапамогу пры траўмах, але і праводзіць работу, каб патэнцыяльныя траўмы прадухіліць. «Тут адносяцца да спартсменаў як не проста да тых, хто павінен паказваць вынік. Спецыялісты цэнтра клапоцяцца пра іх здароўе і думаюць пра якасць іх жыцця і пасля завяршэння спартыўнай кар’еры», — адзначыў намеснік прэм’ер-міністра.
«Спартсмен працуе штодзень, і работа гэта цяжкая. Менавіта нармальнае медыцынскае суправаджэнне, якое праяўляецца ў тым ліку ў псіхалагічнай падтрымцы, фізіятэрапіі, словам, дапамозе пераносіць гэтыя нагрузкі, дае магчымасць атлету максімальна раскрыцца і поўнасцю рэалізаваць свой патэнцыял», — рэзюмаваў Уладзімір Каранік.
