Варданян прызнаны лепшым іграком стартавага тура 36-га чэмпіянату Беларусі па футболе
Карэн Варданян. Фота з архіва sport5.by 24 сакавіка, Мінск . Асацыяцыя «Беларуская федэрацыя футбола» падвяла вынікі стартавага тура 36-га чэмпіянату Беларусі,
Лепшым іграком першага гульнявога дня новага нацыянальнага першынства прызнаны Карэн Варданян. У сярэдзіне першага тайма выязнога паядынку з мазырскай «Славіяй» 22-гадовы нападаючы мінскага «Дынама» аддаў галявы пас Гулжыгіту Алыкулаву, які зраўняў лік, а пасля перапынку сам забіў пераможны гол. Дынамаўцы атрымалі валявую вікторыю з лікам 2:1.
Аўтарам самага прыгожага гола стаў абаронца «Іслачы» Андрэй Макаранка, які эфектным далёкім ударам паразіў вароты дэбютантаў вышэйшай лігі футбалістаў «Баранавіч», устанавіўшы канчатковы вынік сустрэчы — 2:0.
Цяпер у чэмпіянаце краіны настаў невялікі перапынак, звязаны з міжнароднымі матчамі нацыянальнай і маладзёжнай зборных Беларусі.
Гульні другога тура каманды вышэйшай лігі правядуць у пачатку красавіка:
3 красавіка «Арсенал» — «Нафтан», «Дынама» (Брэст) — «Тарпеда-БелАЗ»;
4 красавіка «Нёман» — «Віцебск», «Дынама» (Мінск) — «Белшына», «МЛ Віцебск» — «Іслач»;
5 красавіка «Мінск» — «Гомель», БАТЭ — «Баранавічы», «Днепр» — «Славія».
