«Важна выключыць няроўнасць магчымасцей». Механізм падтрымкі спартыўных арганізацый абмеркавалі ў НАК
16 снежня, Мінск . У НАК Беларусі адбыўся семінар-нарада па пытаннях прымянення ўказа Прэзідэнта Рэспублікі Беларусь ад 17 верасня 2025 года нумар 337 «Аб аказанні падтрымкі спартыўным арганізацыям»,
Згодна з новым механізмам дзяржаўнай падтрымкі спартыўных арганізацый, з гэтага часу федэрацыі змогуць атрымліваць субсідыі з рэспубліканскага бюджэту, а клубы — з мясцовых бюджэтаў, расходаванне сродкаў будзе строга мэтавым. Таксама спыніцца фінансаванне за кошт атрымання спонсарамі льгот па падатку на нерухомую маёмасць, зямельным падатку і падатку на прыбытак.
«Прыняты пакет дакументаў, які прапануе новыя падыходы ў дзяржпадтрымцы спорту. Мы вельмі стараліся таксама ўлічыць пажаданні федэрацый і клубаў, з некаторымі арганізацыямі працавалі разам. Хачу падкрэсліць, што ад фінансавання за кошт падаткаў павінны адыходзіць не толькі спартыўныя, але і наогул усе няўрадавыя арганізацыі. Указ рэгламентуе толькі выкарыстанне дзяржаўных сродкаў, прыватныя сродкі можна расходаваць паводле свайго меркавання», — растлумачыла намеснік прэм’ер-міністра Наталля Пяткевіч.
Таксама віцэ-прэм’ер агучыла прычыны рашэння аб увядзенні новага механізма. «Фінансаванне за кошт падаткаў — гэта нонсэнс, такога не павінна быць. Здаралася, што прадпрыемствы, якія спансіравалі клубы, самі знаходзіліся на дзяржаўнай падтрымцы. Гэта немагчыма. Таксама пры ранейшай схеме не заўсёды можна было забяспечыць справядлівасць пры размеркаванні сродкаў, нам трэба было выключыць няроўнасць магчымасцей. Усе дзяржорганы нацэлены на бясшвовы пераход, каб федэрацыі не адчулі змяненняў», — падкрэсліла Наталля Пяткевіч. 
Фота Дзяніса Касцючэнкі
