Удзельнікі здзелкі — у розных гарадах. Як засведчыць дагавор куплі-продажу кватэры па відэасувязі?
10 ліпеня, Мінск . У Магілёўскім агенцтве па дзяржрэгістрацыі і зямельным кадастры праведзена працэдура засведчання дагавора куплі-продажу кватэры з выкарыстаннем відэасувязі, паведамілі БЕЛТА ў прэс-службе Дзяржаўнага камітэта па маёмасці.
Бакі здзелкі знаходзіліся ў розных гарадах, але змаглі аформіць дакументы без асабістага візіту ў адзін офіс, звярнуўшыся да бліжэйшых рэгістратараў па месцы свайго знаходжання.
Здзелка праведзена сінхронна з удзелам двух рэгістратараў — з Магілёўскага і Мінскага абласных агенцтваў. Аператыўнасць і зручнасць — пры поўным захаванні ўсіх юрыдычных фармальнасцей.
Такія здзелкі ўжо не адзінкавыя ў краіне. Напрыклад, 5 лютага 2026 года дагавор куплі-продажу кватэры ў Віцебску таксама быў аформлены анлайн — прадавец знаходзіўся ў Віцебску, пакупнік — у Мінску. Дакумент падпісалі на планшэце, а рэгістратары пацвердзілі яго электроннымі подпісамі.
Прававую аснову працэдуры складаюць абнаўленні закона «Аб дзяржаўнай рэгістрацыі нерухомай маёмасці, правоў на яе і здзелак з ёй», якія ўступілі ў сілу ў мінулым годзе.
«Гэты фармат максімальна арыентаваны на грамадзян: скарачэнне часавых і фінансавых затрат, адсутнасць неабходнасці асабістай прысутнасці ў адным месцы», — адзначылі ў Дзяржаўным камітэце па маёмасці.
