Аб’ём заключаных кантрактаў на Форуме рэгіёнаў Беларусі і Расіі перавысіў 1,7 млрд рублёў
Раман Бродаў 26 чэрвеня, Мінск . Аб’ём заключаных кантрактаў на Форуме рэгіёнаў Беларусі і Расіі перавысіў 1,7 млрд беларускіх рублёў. Аб гэтым расказаў старшыня Пастаяннай камісіі па эканоміцы, бюджэце і фінансах Савета Рэспублікі Раман Бродаў на пленарным пасяджэнні Форуму рэгіёнаў Беларусі і Расіі,
Раман Бродаў расказаў аб рабоце 10 секцый і двух мерапрыемстваў, якія праходзілі ў розных фарматах і лакацыях у дні Форуму рэгіёнаў. «Калі форум — гэта мост паміж нашымі краінамі, то першы рэзультат, які я хацеў бы канстатаваць, гэта тое, што гэты мост вытрымаў нагрузку 1600 чалавек. Паводле даных на бягучы момант, амаль 1600 чалавек прынялі ўдзел у мерапрыемствах форуму. І мост не проста вытрымаў, а паказаў, што ў нас ёсць сур’ёзны запас трываласці. Правялі ўсё, што задумана, мерапрыемствы ўсе адбыліся, а запланаваныя дакументы падпісаны. Для арганізатараў гэта гучыць амаль як прафесійная мара», — адзначыў ён.
Паводле яго слоў, у ходзе секцыйных пасяджэнняў прагучала амаль 160 дакладаў, і ў іх развіццё не менш як 150 разгорнутых каментарыяў. «Калі іх выбудаваць у адзін часавы рад, то атрымаем амаль 24 гадзіны якасных ідэй, прапаноў, ініцыятыў. І, як часта гаворыць наш Прэзідэнт, ініцыятыва — гэта жыццё. Нам удалося ўзяць вельмі высокую планку ў змястоўнай частцы форуму. Паводле сціплых ацэнак, абмеркаваннямі было ахоплена не менш як палавіну нашага двухбаковага саюзнага парадку дня. І, паводле слоў саміх удзельнікаў, самым дэфіцытным рэсурсам аказаўся свабодны час. На некаторых секцыях фактычная колькасць жадаючых выступіць у 2,5 раза перавысіла колькасць тых, хто быў прадугледжаны пачатковым рэгламентам», — заўважыў старшыня.
Тым не менш, эканоміка не любіць гучных слоў, яна любіць рэзультат, заўважыў Раман Бродаў. «Ключавым вынікам форуму стала значнае нарошчванне дагаворнай базы міжрэгіянальнага і камерцыйнага супрацоўніцтва. Аб’ём заключаных кантрактаў перавысіў 1,7 млрд беларускіх рублёў. Гэта амаль у два разы больш за вынікі папярэдняга форуму. Агульная колькасць кантрактаў дасягнула 220. У ходзе ўсіх пасяджэнняў было падпісана амаль 90 пагадненняў, мемарандумаў і дагаворных дакументаў. З году ў год форум даказвае, што ў інтэграцыі класічныя законы матэматыкі ўступаюць законам сінергіі. У нас адзін плюс адзін — гэта не заўсёды два. Гэта можа быць і тры, і чатыры, і нават пяць. У нашым выпадку мы на практыцы бачым, што эканамічны саюз двух — гэта значна больш, чым сума двух складаемых», — падкрэсліў Раман Бродаў.
У ходзе секцый сумесны патэнцыял быў разгледжаны з пяці пазіцый, дадаў ён. «Першая — эканоміка і ўмацаванне тэхналагічнага суверэнітэту праз прызму стратэгічных напрамкаў у прамысловасці і навукова-тэхналагічнай сферы. Асаблівы акцэнт быў зроблены на развіцці новага інструмента — «Тавар Саюзнай дзяржавы». Другое — забеспячэнне харчовай бяспекі і збалансаванае развіццё АПК. На самай шматлікай па колькасці ўдзельнікаў секцыі абмяркоўвалася міжрэгіянальнае супрацоўніцтва. І такі інтарэс цалкам абгрунтаваны: эканоміка заўсёды пачынаецца з зямлі. Кантрольныя органы Беларусі і Расіі абмяркоўвалі правядзенне ацэнак выкарыстання патэнцыялу рэгіёнаў. Чацвёрты блок пытанняў датычыўся ўзаемадзеяння Беларусі і Расіі па гуманітарных аспектах. Удзельнікі секцый падтрымалі развіццё механізмаў дыстанцыйнага ўзаемадзеяння паміж медыцынскімі цэнтрамі Беларусі і Расіі. Знойдзены сумесныя рашэнні ў сферы турызму. Пяты блок — маладзёжны парадак дня. Форум становіцца маладзейшым, і калі на пляцоўках, дзе абмяркоўваюцца перспектыўныя праекты, даводзіцца шукаць свабоднае месца, будучыня Саюзнай дзяржавы бачыцца больш упэўненай», — звярнуў увагу старшыня пастаяннай камісіі.
Традыцыяй форума з’яўляецца правіла ўключаць у праграму мерапрыемства, якое праводзіцца ўпершыню. На гэты раз такім стала першае пасяджэнне Камітэта па стандартызацыі і якасці Саюзнай дзяржавы.
«Прыемным момантам форуму стала цырымонія ўзнагароджання лаўрэатаў конкурсу «Лепшыя тавары Беларусі на рынку Расіі». Таксама ў рамках форуму адбылася экспертная сесія на тэму «Саюзная дзяржава — тэрыторыя развіцця», якая аб’яднала больш як 70 экспертаў з дзвюх краін. Традыцыйнае ўпрыгажэнне форуму — выстаўка-кірмаш. Абноўлены фармат з акцэнтам на рэгіёнах даў магчымасць аб’яднаць 170 вытворцаў Беларусі і Расіі», — падкрэсліў Раман Бродаў.
Асабліва ён адзначыў атмасферу. «Яе нельга апісаць або ўнесці ў справаздачу. Але менавіта яна часта вызначае рэзультат», — заўважыў ён.
Паводле слоў старшыні пастаяннай камісіі, форум паказаў, што галоўным капіталам беларуска-расійскага супрацоўніцтва, безумоўна, з’яўляецца давер. «Ніякія сучасныя тэхналогіі не могуць замяніць асабістую размову. Кожная сустрэча, кожнае выступленне, кожны кантакт — гэта як новая сувязная ніць, а ўсе разам яны сплятаюцца ў трывалы канат супрацоўніцтва нашых рэгіёнаў», — рэзюмаваў Раман Бродаў.
XIII Форум рэгіёнаў Беларусі і Расіі праходзіць 25 і 26 чэрвеня ў Мінску і Мінскай вобласці. За гады правядзення форум набыў статус традыцыйнай дыялогавай пляцоўкі для прадстаўнікоў органаў улады і бізнес-супольнасцей дзвюх краін. Арганізатары форуму — Савет Рэспублікі Нацыянальнага сходу Беларусі і Савет Федэрацыі Федэральнага сходу Расіі.
Фота Андрэя Сіняўскага, Віталя Піваварчыка
