Хрэнін заявіў аб спакойнай абстаноўцы вакол Беларусі і адсутнасці прыкмет агрэсіі
Віктар Хрэнін 22 ліпеня, Мінск . Вакол Беларусі складваецца стабільная абстаноўка без прыкмет агрэсіі. Аб гэтым міністр абароны Віктар Хрэнін заявіў па выніках даклада кіраўніку дзяржавы,
Прэзідэнту даложана аб мерапрыемствах ваеннай падрыхтоўкі ва Узброеных Сілах, абстаноўцы, якая складваецца вакол краіны, дапамозе аграрыям з боку ваеннаслужачых у час уборачнай. Ваенна-палітычную абстаноўку вакол Беларусі Віктар Хрэнін ахарактарызаваў як стабільную, адзначыўшы, што напружанне пераважае ў асноўным у інфармацыйным полі.
«Сочачы за дзейнасцю ўзброеных сіл краін НАТА, мы не бачым вялікай актыўнасці. У сумежных краінах праходзіць мінімальная колькасць вучэнняў — усяго адно, мінімальная колькасць палётаў. Таму мы і лічым, што яна (абстаноўка вакол Беларусі. — Заўвага БЕЛТА) стабільная, і нейкай пагрозы, напружання, падрыхтоўкі да раптоўнага нападзення мы не бачым», — заявіў Віктар Хрэнін.
Што датычыцца паўднёвых рубяжоў Беларусі, то кіраўнік абароннага ведамства канстатаваў, што з боку ўкраінскіх фарміраванняў няма прыкмет падрыхтоўкі да агрэсіўных дзеянняў. «На сённяшні дзень мы не бачым, што ад украінскіх фарміраванняў, якія забяспечваюць прыкрыццё сваёй граніцы, ідзе падрыхтоўка да нейкіх агрэсіўных актыўных дзеянняў. Нягледзячы на тое, што ў інфармацыйным полі гучыць рознае, для іх напружанне на нашай граніцы не патрэбна», — лічыць Віктар Хрэнін.
«Мы, вядома ж, не расслабляемся. Там сёння на (паўднёвай. — Заўвага БЕЛТА) граніцы, і ўчора гэта Прэзідэнт падкрэсліў, знаходзіцца мінімальны камплект падраздзяленняў сіл спецыяльных аперацый, якія ва ўзаемадзеянні з пагранічнікамі забяспечваюць пытанні бяспекі ў прыгранічнай зоне, — падкрэсліў міністр. — Самае галоўнае, мы павінны быць гатовы да любых раптоўных дзеянняў, таму гэты мінімальны камплект войскаў мы там трымаем».
Падрыхтоўка асабовага складу праводзіцца на планавай аснове з улікам аналізу і высноў, зробленых па выніках комплекснай праверкі ў пачатку года.
