«Тым, хто не вярнуўся з палёту»: у Віцебску адкрылася беларуска-расійская выстава аб героях-лётчыках
23 студзеня, Віцебск /Алеся Пушнякова . У віцебскім Музеі гісторыі прыватнага калекцыяніравання адкрылася беларуска-расійская пошукавая выстава «Тым, хто не вярнуўся з палёту», прысвечаная лётчыкам — героям Вялікай Айчыннай вайны, 
Праект прысвечаны вывучэнню баявога шляху авіяцыйных часцей і злучэнняў, устанаўленню лёсаў і ўвекавечанню памяці авіятараў, якія прапалі без вестак, пошуку і захаванню рэліквій. Вынікі шматгадовай работы ўдзельнікаў праекта прадстаўлены ў экспазіцыі, якую могуць убачыць жыхары і госці Віцебска.
«Яшчэ ў год 80-годдзя Вялікай Перамогі з’явілася ідэя зрабіць выставу пра лётчыкаў, таму што вельмі многія з іх пайшлі на заданні і не вярнуліся. Частка з іх да гэтага часу лічыцца прапаўшымі без вестак. Таксама тут ёсць звесткі пра лётчыкаў, якія прапалі ў час Афганскай вайны. Мы не чакалі, што столькі народа адгукнецца. Каля 30 арганізацый, уключаючы пошукавыя атрады, школы, музеі, прынялі запрашэнне паўдзельнічаць у гэтай выставе і прадаставіць экспанаты для яе, і тут нават не ўсё ўмясцілася. Для мяне такая экспазіцыя асабліва дарагая, таму што некалі клуб «Шукальнік», які я стварала, у 1984 годзе ў першай сваёй пошукавай экспедыцыі паднімаў самалёт са дна возера — з 6-метровай глыбіні, разам з лётчыкам, якога ўдалося апазнаць. Мы ўсе павінны памятаць аб подзвігу людзей, якія змагаліся за вызваленне нашай Радзімы», — сказала старшыня Савета па ўзаемадзеянні пошукавых атрадаў Віцебскай вобласці «Пошук» Ларыса Бруева.
Віцебскія гледачы ўпершыню змаглі азнаёміцца з экспазіцыяй фрагментаў самалёта і асабістых рэчаў экіпажа Героя Савецкага Саюза Мікалая Гастэлы, дакладнае месца гібелі якога да нядаўняга часу было невядома. «Астанкі самалёта легендарнага лётчыка і героя мы знайшлі 26 чэрвеня 2025 года. Да пачатку пошукавых работ мы не ведалі, што гэта быў менавіта той самы самалёт, для нас гэта былі чарговыя раскопкі. І толькі калі мы знайшлі нумарныя знакі і ўдакладнілі па архіўных дакументах, то зразумелі, што перад намі — легенда. Таксама мы знайшлі фрагменты нямецкай аўтакалоны, якую пратараніў падбіты самалёт Мікалая Гастэлы. Для кожнага з удзельнікаў пошукаў гэта вельмі значная знаходка, гэта пачэсна, і такое запамінаецца на ўсё жыццё», — расказала журналістам аб унікальнай знаходцы ўдзельнік групы «Авіяпошук-Барысаў» Таццяна Балашова.
На выставе прадстаўлены асабістыя рэчы і астанкі баявых машын, малюнкі дзяцей і моладзі Беларусі і Расіі, мадэлі самалётаў і баявой тэхнікі часоў Вялікай Айчыннай вайны, калекцыі тэматычных кніг і часопісаў аб заваёўніках неба. Праект «Тым, хто не вярнуўся з палёту» рэалізуецца пры ўдзеле пошукавых атрадаў з Наваполацка, Барысава, Шклова, Мінска, Масквы. Выставу ўсе жадаючыя могуць наведаць да 24 лютага. 
Фота Аляксандра Хітрова
