Пуцін: Расія гатова правесці аб’ектыўнае расследаванне па сітуацыі з БПЛА ў Румыніі
Уладзімір Пуцін. Фота ТАСС 29 мая, Мінск /Кар. БЕЛТА/. Расія гатова правесці аб’ектыўнае расследаванне, калі ёй перададуць абломкі дрона, што ўпаў у Румыніі. Аб гэтым заявіў прэзідэнт РФ Уладзімір Пуцін, паведамляе ТАСС.
«Няхай нам перададуць нейкія даныя і астаткі дрона, мы правядзём аб’ектыўнае расследаванне. І толькі тады ў гэтым выпадку дадзім ацэнку таго, што здарылася», — сказаў расійскі лідар.
Прэзідэнт РФ выказаў меркаванне, што ў Румыніі, хутчэй за ўсё, меў месца інцыдэнт з украінскім БПЛА. «Бо мы ведаем, што і ў Фінляндыю заляталі ўкраінскія дроны, і ў Польшчу, і кудысьці ў краіны Балтыі заляталі ўкраінскія дроны. Першая рэакцыя была такая ж, як цяпер вось у Румыніі. Потым, праз кароткі час, высвятлялася, што нічога агульнага з расійскімі лятальнымі апаратамі гэта не мае, а гэта дроны ўкраінскага паходжання, яны збіліся з курсу, яны пад уздзеяннем РЭБ або яшчэ па нейкіх прычынах, з-за недасканаласці тэхнічных даных туды заляцелі і там упалі», — сказаў расійскі прэзідэнт, гаворачы аб тым, што выпадкі падзення дронаў УСУ на тэрыторыі еўрапейскіх краін ужо бывалі. «У гэтым выпадку думаю, што, хутчэй за ўсё, размова ідзе менавіта аб такой сітуацыі», — падкрэсліў ён.
Прэзідэнт Расіі адзначыў, што ніхто не можа дакладна гаварыць аб паходжанні БПЛА да экспертызы абломкаў.
Беспілотнік упаў у ноч 29 мая на дах шматкватэрнага жылога дома ў румынскім горадзе Галацы, выклікаўшы пажар. Перад гэтым насельніцтву быў перададзены сігнал трывогі на мабільныя тэлефоны. Паводле інфармацыі румынскіх СМІ, у выніку пажару лёгкія апёкі атрымалі два чалавекі. Бухарэст усклаў адказнасць за інцыдэнт з БПЛА на Расію. Румынія праінфармавала аб здарэнні саюзнікаў і генеральнага сакратара НАТА, а таксама запатрабавала прыняць меры па паскарэнні перадачы ёй абсталявання па барацьбе з дронамі.
Вярхоўным саветам абароны Румыніі з-за інцыдэнту з падзеннем БПЛА на жылы дом было прынята рашэнне закрыць генконсульства РФ у Канстанцы, генеральны консул быў аб’яўлены персонай нон грата. МЗС Румыніі выклікала пасла РФ Уладзіміра Ліпаева, каб праінфармаваць аб мерах, якія будуць прыняты на дыпламатычным узроўні пасля інцыдэнту з беспілотнікам.
Афіцыйны прадстаўнік МЗС Расіі Марыя Захарава заявіла, што меры ў адказ Масквы на закрыццё генконсульства РФ у Румыніі і аб’яўленне персонай нон грата генконсула Андрэя Касіліна не прымусяць сябе чакаць.-0-
