«Святло намаляванага дзяцінства». Выставу да 55-годдзя беларускай анімацыі прадставілі ў Мінску
Фота музея 26 лютага, Мінск . Часовая экспазіцыя «Святло намаляванага дзяцінства», прымеркаваная да 55-годдзя беларускай анімацыі, адкрылася ў Музеі гісторыі беларускага кіно — філіяле Нацыянальнага гістарычнага музея. Аб гэтым расказала загадчыца музея Вераніка Себруковіч.
«Сёлета мы адзначаем 55 гадоў з дня стварэння беларускай анімацыі. Гэта адбылося ў 1971 годзе, калі пад эгідай творчага аб’яднання «Экран» паказалі лялечны мультфільм «Нязнайка-паэт». З таго часу да гэтага дня на анімацыйнай студыі «Беларусьфільма» было створана больш за 250 анімацыйных кінакарцін»,- сказала Вераніка Себруковіч.
На яе думку, беларускую анімацыю вызначае самабытнасць, шанаванне легенд і паданняў, на аснове якіх ствараюцца цікавыя мультфільмы. Гэта ўнікальны свет, у якім пераплятаюцца традыцыі і інавацыі, мастацкае адлюстраванне і культурныя каштоўнасці. З моманту свайго ўзнікнення яна зарэкамендавала сябе як важная частка нацыянальнага мастацтва, здольная не толькі забаўляць, але і перадаваць глыбокія ідэі і пачуцці. Майстры анімацыі часта чэрпаюць натхненне з народных паданняў і міфаў, што надае іх работам унікальны каларыт і дае магчымасць захоўваць і перадаваць багацце беларускай культуры наступным пакаленням.
На выставе можна ўбачыць каля 300 экспанатаў: арыгінальныя эскізы, сцэнарыі, афішы і іншыя матэрыялы, якія дапамогуць наведвальнікам лепш зразумець працэс стварэння анімацыйных шэдэўраў. Выстава прадстаўляе работы вядомых беларускіх аніматараў, таленавітых мастакоў, чые творы пакінулі свой след у гісторыі анімацыі.
У аснове экспазіцыі — прадметы з фондаў Нацыянальнага гістарычнага музея Беларусі, рэдкія дакументы са збору Нацыянальнага архіва Беларусі, а таксама матэрыялы, прадстаўленыя студыяй анімацыйных фільмаў Нацыянальнай кінастудыі «Беларусьфільм».
«Стварэнне анімацыі — сапраўды карпатлівая праца. Каб стварыць 13-мінутны мультфільм, патрэбна ў сярэднім 9 месяцаў. Вельмі важна, што выстава ілюструе сучасны стан беларускай анімацыі. Яна паказвае, што тыя традыцыі, якія былі закладзены яшчэ ў савецкі час беларускімі аніматарамі, прадаўжаюць існаваць, і сёння беларускія аніматары прадаўжаюць працаваць над стварэннем мультфільмаў і атрымліваюць розныя ўзнагароды на кінафестывалях дзіцячых і сямейных фільмаў», — дадала Вераніка Себруковіч.
У час работы экспазіцыі можна будзе ўбачыць не толькі эскізы, але і фрагменты саміх мультфільмаў. Музей арганізуе кіналекторыі пра беларускія мультфільмы, якія пакажуць высокі прафесійны ўзровень нашых аніматараў.
Экспазіцыя прадоўжыць работу да 13 мая.
