«Спадзяюся, тут вырастуць будучыя чэмпіёны». Сабаленка адкрыла новыя тэнісныя корты ў Мінску
Арына Сабаленка 14 ліпеня, Мінск . Першая ракетка свету Арына Сабаленка прыняла ўдзел у адкрыцці новых тэнісных кортаў на тэрыторыі сталічнай школы нумар 86, дзе пачынаўся яе шлях у вялікі спорт. У час мерапрыемства спартсменка правяла майстар-клас для юных тэнісістаў і адказала на пытанні ўдзельнікаў,
Вяртанне ў родную школу, прызналася Арына Сабаленка, выклікала ў яе асаблівыя эмоцыі. «Столькі добрых успамінаў, столькі натхняльных эмоцый і радасці. Вельмі рада зноў аказацца дома, пагутарыць з сябрамі, якіх даўно не бачыла, пабываць у школе, дзе ўсё пачыналася і дзе мне ў свой час вельмі моцна дапамаглі», — сказала спартсменка.
Такія сустрэчы, паводле слоў тэнісісткі, натхняюць не толькі дзяцей, але і яе самую. «Усе думаюць, што гэта я натхняю дзяцей. Не, гэта яны натхняюць мяне. Вельмі рада бачыць столькі юнакоў і дзяўчат, якія гараць тэнісам і мараць стаць вялікімі спартсменамі, — адзначыла першая ракетка свету. — Цяжка ўдзяліць увагу кожнаму, але я спадзяюся, што атрымалася аддаць хаця б невялікую часцінку сябе кожнаму дзіцяці».
Адказваючы на пытанне, якую параду яна дала б спартсменам-пачаткоўцам, Арына Сабаленка падкрэсліла, што галоўнае — верыць ва ўласныя сілы. «Калі на 100 працэнтаў аддавацца любімай справе і шмат працаваць, магчымасці абавязкова з’явяцца. Галоўнае здолець імі скарыстацца», — адзначыла тэнісістка.
Паводле яе слоў, новыя корты стануць укладам у развіццё дзіцячага спорту. «Гэта толькі маленькі крок у лепшую будучыню. Ёсць яшчэ шмат ідэй і праектаў. Спадзяюся, нам удасца стварыць максімальна камфортныя ўмовы для дзяцей, каб менавіта тут выраслі будучыя чэмпіёны», — падкрэсліла Арына Сабаленка. 
Фота Сяргея Шэлега
